Odamatan ró-ahi Berlin-Ramelau ne’ebé labele loke, iha Portu Dili, sesta (11/03). Imajen TATOLI/Antónia Gusmão

DILI, 21 marsu 2022 (TATOLI)—Durante semana ida resin ona ró-ahi Berlin-Ramelau halo operasaun Dili – Oé-cusse tula ema no sasán maibé labele tula karreta no motorizada tanba odamatan a’at.

“Odamatan seidauk di’ak tanba pesa ba odamatan nian maka seidauk to’o, sosa tiha ona iha Alemaña maibé seidauk to’o mai Timór,” Prezidente Konsellu Administrasaun Autoridade Portuáriu Timor-Leste, Empreza Públika (APORTIL, E.P), Lamartino de Oliveira, informa ba Agência TATOLI, via telefónika, segunda ne’e.

Odamatan ró ne’e a’at desde loron 10 marsu 2022, nune’e loron ne’e kedan kansela viajen bá Oé-cusse no iha loron tuir mai, ekipa hosi APORTIL, E.P no ró-ahi Berlin-Ramelau buka alternativa hodi rezolve maibé la konsege, nune’e ekipa sira monta fali eskada hosi odamatan parte ró sorin hodi pasajeiru sira bele la’o tama ba ró laran.

Notísia relevante: Provizóriu, Berlin-Ramelau tula pasajeiru-sasán la inklui transporte bá Oé-cusse

Nune’e, Prezidente APORTIL husu ba públiku atu pasiénsia tanba daudaun ne’e ekipa esforsu hela hodi normaliza odamatan.

“Pesa ne’e kiik-oan rua de’it ho óleu frasku kiik ida, ne’ebé kuandu to’o ona mai tékniku sira monta lalais de’it,” nia garante.

Iha loron 20 dezembru 2021, Governu Alemaña ofisialmente entrega ró-ahi Berlin-Ramelau ba Governu Timor-Leste liuhosi Ministériu Transporte no Komunikasaun (MTK).

Iha loron 31 maiu 2019, Governu Timor-Leste reprezenta hosi MTK, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlim-Ramelau.

Projetu ne’e Governu Alemaña kontribui millaun €7,8 no Timor-Leste millaun €7,1.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here