Tékniku sira monta hela eskada hodi pasajeiru sira bele liu tama ba ró-ahi Berlin-Ramelau laran, iha Portu Dili, sesta (11/03). Imajen TATOLI/Antónia Gusmão

DILI, 11 marsu 2022 (TATOLI)—Ró-ahi Berlin-Ramelau ne’ebé tuir ajenda atu halo operasaun iha kinta (10/03) la konsege tanba odamatan labele loke.

Maski nune’e, ekipa Autoridade Portuáriu Timor-Leste (APORTIL) no ró-ahi Berlin-Ramelau buka alternativa hodi rezolve, hanesan monta fali eskada hosi odamatan parte ró sorin hodi pasajeiru sira bele la’o tama ba ró laran.

“Viajen horiseik kansela tanba odamatan la funsiona ho di’ak, tékniku sira esforsu maka’as desde horiseik maibé laiha solusaun, nune’e ohin mak buka alternativa hodi funsiona odamatan sorin ró. Ha’u mai observa direta ró no agora bele halo operasaun ba Óe-cusse, maibé tula de’it pasajeiru ho sasán, enkuantu transporte hanesan karreta no motór labele,” Ministru Transporte no Komunikasaun, José Agustinho da Silva, informa ba Agência TATOLI, hafoin observa preparasaun téknika sira iha APORTIL, Portu Dili, sesta ne’e.

Notísia relevante: Tripulante timor-oan familiár ona ho fasilidade ró-ahi Berlin-Ramelau

Tuir Ministru, kestaun ne’e akontese tanba pesa ró ne’e elektróniku hotu, entaun falla ne’e afeta ba parte seluk.

Odamatan ró-ahi Berlin-Ramelau ne’ebé labele loke, iha Portu Dili, sesta (11/03). Imajen TATOLI/Antónia Gusmão

“Akontesimentu ne’e fulan kotuk bainhira pasajeiru nia karreta ida soke odamatan, entaun kontinuasaun to’o horiseik halo ró labele halo viajen Dili bá Oé-cusse tanba tékniku sira halo tun-sa’e odamatan labele taka ou loke, maibé sorte tanba falla iha Dili, ba mak falla iha tasi laran ne’e problema,” nia akresenta.

Tuir Governante ne’e, Governu no APORTIL buka alternativa hodi garante nafatin konetividade marítima hodi fasilita materiál sensitivu eleisaun to’o iha destinasaun no populasaun Oé-cusse bele ezerse votu iha Eleisaun Prezidensiál.

“Difikuldade odamatan ne’e iha buat ida naran idrolik (makaku) ho ninia pesa balun mak la funsiona, entaun laiha forsa maka’as atubele foti odamatan no bainhira obriga óleu bele sai. Tékniku sira informa katak sei bele arranja sasán ne’e, maibé tenki sosa iha nasaun sira hanesan Xina, Austrália no Alemaña, ne’ebé sei lori semana ida, maibé ha’u orienta atu sedu liu di’ak liu,” nia esplika.

Maski nune’e, Ministru garante ein termu seguransa ba pasajeiru sira aseguradu, maski uza de’it odamatan alternativa.

“Entaun movimentu ema ho sasán bele asegura enkuantu karreta labele, maibé iha ró privadu Bintang Samudra bele tula,” nia tenik.

Iha loron 20 dezembru 2021, Governu Alemaña ofisialmente entrega ró-ahi Berlin-Ramelau ba Governu Timor-Leste liuhosi Ministériu Transporte no Komunikasaun (MTK).

Iha loron 31 maiu 2019, Governu Timor-Leste reprezenta hosi MTK, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlim-Ramelau.

Projetu ne’e Governu Alemaña kontribui millaun €7,8 no Timor-Leste millaun €7,1.

Jornalista : Antónia Gusmão

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here