Ekipa STAE nasionál distribui materiál eleisaun ba sentru votasaun iha Dili, sesta (18/03). Imajen TATOLI/António Dasiparu

DILI,18 marsu 2022 (TATOLI)—Sekretariadu Tékniku Administrasaun Eleitorál (STAE), sesta ne’e, distribui simultáneamente materiál eleisaun ba sentru votasaun estabelesidu iha territóriu nasionál, hanesan mós iha suku Bemori, postu Na’in-feto, munisípiu Dili estabelese rua ba votante 3.637.

“Distribuisaun materiál sensitivu no naun sensitivu to’o ona iha sentru votasaun rua iha suku Bemori, daudaun ne’e asegura ona iha sentru ida-idak hodi garante Eleisaun Prezidensiál iha loron 19 marsu 2022 hahú tuku 07 to’o 15:00,” Xefe suku Bemori, Cristalina Pereira Soares de Oliveira, informa ba Agência TATOLI, iha ninia knaar fatin, sede suku Bemori.

Notísia relevante: Ohin, STAE distribui materiál eleisaun ba sentru votasaun 1.200 iha territóriu nasionál

Suku Bemori estabelese sentru votasaun iha sede suku ho estasaun votu rua no iha Eskola Ensinu Báziku (EBF) Duque de Caxias ho estasaun votu rua.

Aleinde ne’e, Brigada no polling staff sira iha sentru rua halo ona preparasaun ho di’ak no konsege instala ona materiál naun sensitivu sira.

“Eleisaun Prezidensiál atu la’o di’ak presiza kontribuisaun ema hotu nian hodi garante festa demokrasia, tanba eleisaun sira hanesan ne’e akontese kada tinan-lima, tanba ne’e ema hotu iha obrigasaun kontribui,” nia akresenta.

Nune’e, Autoridade suku ne’e husu ba responsável eleisaun sira atu tulun malu hodi lori eleisaun ne’e to’o hetan rezultadu di’ak.

“Servisu tenke profisionál no tenke iha responsabilidade. Tenke tau interese nasionál a’as liu hodi hamiis interese partidária iha prosesu eleisaun ne’e, tanba ho nune’e de’it maka eleisaun ne’e sei la’o ho susesu no hetan rezultadu di’ak,” nia tenik.

Tuir dadus hosi STAE, to’o loron 08 novembru 2021 eleitór ne’ebé resensiadu no atualizadu foun no tuan iha baze dadus akumula 855.597, kompostu hosi diáspora 6.538 no rai-laran 849.059.

Iha eleisaun, STAE identifika sentru votasaun hamutuk 1.200 no estasaun votu iha 1.500 iha territóriu tomak.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here