DILI, 18 marsu 2022 (TATOLI)—Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco hateten, ohin STAE distribui materiál eleisaun ba sentru votasaun 1.200 no estasaun votasaun 1.500 iha territóriu nasionál.
Notísia Relevante: 18 marsu, STAE sei distribui materiál eleisaun ba sentru votasaun sira
“Ita halo ona distribuisaun materiál eleisaun nian iha loron 11 marsu ba iha munisípiu sira hotu no ohin ita halo serimónia simultaneamente materiál hotu-hotu iha edifisíu STAE munisípiu sira 12 inklui RAEOA,” Acilino hateten ba jornalista sira, iha salaun STAE Caicoli, Dili, sesta ne’e.
Iha distribuisaun materiál ne’e hetan seguransa másima hosi Polísia Nasionál Timor-Leste (PNTL) no Falintil-Forsa Defeza Timor-Leste (F-FDTL), hosi órgaun eleitorál ho observadór nasionál no internasionál, fiskál kandidatura sira nune’e mós autoridade no entidade importante sira kada munisípiu no rejiaun.
Fiskál munisípiu Dili bainhira distribui urna ba sentru votasaun sira, sesta (18/03) ne’e. Imajen TATOLI/António Dasiparu.
“Ha’u simu informasaun hodi diretór STAE munisipál sira katak materiál eleisaun nian to’o ona iha fatin nesesariamente suku sira ho kondisaun ne’ebé mak di’ak hotu. Sentru votasaun ne’ebé mak besik komesa transporta ona no sei akompaña hosi brigada, ofisiál monitorizadór hosi CNE nian konserteza hosi kada fiskál sira depois hetan seguransa hosi PNTL,” nia informa.
Tuir nia, iha ohin kalan ne’e materi’al eleisaun hirak ne’e sei hela ho sira iha sentru votasaun to’o aban dadeer tuku 06h00 no sei entrega fali ba brigada no fiskál sira hodi hahú loke urna, nune’e halo preparasaun no aban (19/03) sentru no estasaun votasaun hotu-hotu sei funsiona iha oras 07h00 dadeer to’o 15h00 ne’e, ema hotu-hotu bele ezerse ninia direitu votu.
Diretór Jerál ne’e hateten, sentru votasaun 1.200 no estasaun votasaun 1.500 iha territóriu nasionál inklui diáspora nian ho eleitor hamutuk 859.613 no diaspora hamutuk 7.113 ne’ebé kompostu hosi Australia 1.487, Korea do Sul 1.277, Inglatera 2.203, Irlandia do Norte 1.290 no Portugal 856.
Hosi sentru votasaun 1.200 ne’e kompostu hosi munisípiu Aileu iha sentru votasaun hamutuk 73 no estasaun votasaun 80 ho nia eleitór 33.603, Ainaro iha sentru votasaun 70 no estasaun votasaun 88 ho nia eleitór 45.833, Baucau iha sentru votasaun 125 no estasaun votasaun 150 ho nia 96.207.
Munisípiu Bobonaro iha sentru votasaun 130 no esatasaun votasaun 150 ho nia eleitór 70.283, Covalima iha sentru votasaun 80 no estasaun votasaun 92 ho nia eleitór 47.807, Dili iha sentru votasaun 130 no estasaun iha 237 ho nia eleitór 190.710, Ermera iha sentru votasaun 115 no estasaun votasaun 135 ho nia eleitór 82.714.
Munisípiu Lautém iha sentru votasaun 80 no estasaun votasaun 91 ho nia eleitór 48.012, Liquiça iha sentru votasaun 72 no estasaun votasaun 80 ho nia eleitór 50.987, Manatuto iha sentru votasaun 70 no estasaun votasaun 78 ho nia eleitór 35.603.
Munisípiu Manufahi iha sentru votasaun 94 no estasaun votasaun 112 ho nia eleitór 40.825, Rejiaun Administratiba espesiál Oé-Cusse Ambeno (RAEOA) iha sentru votasaun 60 no estasaun votasaun 88 ho nia eleitór 51.495 no munisípiu Viqueque iha sentru votasaun 92 no estasaun votasaun 110 ho nia eleitór 58.421.
Kona-ba diáspora nian, Austrália iha sentru votasaun tolu (3) no estasaun votasaun tolu (3), Korea do Sul iha sentru votasaun ida (1) no estasaun votasaun ida (1), Irlandia do Norte iha sentru votasaun ida (1) no estasaun votasaun ida (1), Portugal iha sentru votasaun rua (2) no estasaun rua (2) no Reinu Unidu iha sentru votasaun rua (2) no estasaun votasaun rua (2).
Jornalista : Osória Marques
Editór : Cancio Ximenes
