Ofsiál membru fiskál sira bainhira halo distribuisaun ba buletin votu iha STAE, sesta (11 marsu 2022). Imajen Tatoli/Antonio Daciparu.

DILI, 16 marsu 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten Prosesu pakotemente materiál ba sentru votasaun sira hahú iha tersa (15/03) to’o kinta (17/03).

Nia informa, munisípiu balun kuaze konklui hotu ona no balun sei prosesu pakotemente, nune’e iha loron 18 marsu iha dadeer ne’e iha munisípiu 12 inklui RAEOA halo serimónia hodi halo distribuisaun ba suku sira hotu.

“Hosi tersa to’o aban (17/03) ita hahú halo pakotemente bulletin votu tuir nesesidade kada sentru nian nune’e mós materiál sira seluk hanesan tinta, urna, kavina votu nian, no materia eskritóriu ba sentru no estasaun sira, nune’e halo preparasaun másima ba loron 19 marsu. Loron 18 marsu, ita sei distribui materiál hirak ne’e ba sentru votasaun iha suku sira,” Acilino hateten ba Agência TATOLI, iha nia knaar fatin Caicoli, kuarta ne’e.

Molok atu distribui. STAE mós halo hela preparasaun ba transporte hodi transporta materiál ba sentru votasaun no estasaun sira iha territóriu nasionál, no tuir planu STAE sei uza viatura hamutuk 517 hodi transporta materiál ba sentru sira hotu.

Iha nivel sentrál, STAE rekolla ona viatura hamutuk 150 maibé antes ne’e patrimóniu Estadu mós entrega ona viatura balun ba munisípiu sira, depois horisehik entrega tan viatura 128 no viatura 100-resin ne’ebé mak ita identifikadu viatura Estadu nian iha munisípiu sira.

“Tanba númeru viatura ne’ebé ita presiza barak entaun ho ne’e ita mós sei aluga tan viatura balun hodi suporta ba viatura hosi Estadu no patrimóniu Estadu nian hodi bele transporta materiál ba sentru no estasaun votasaun sira iha suku,” nia dehan.

Iha kuarta (16/03) ne’e, motorista no viatura sira konsentra hotu iha STAE halo preparasaun no aban hotu-hotu sei desloka ba iha munisípiu ida-idak para nune’e iha loron 18 lori materiál ba suku.

Sentru votasaun iha territóri nasionál hamutuk 1.200 no estasaun iha 1.500.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here