Primeiru-Ministru (PM) Taur Matan Ruak. Imajen Tatoli/Francisco Sony

DILI, 04 marsu 2022 (TATOLI)— Primeiru Ministru Taur Matan Ruak, hala’o enkontru ho Vise Ministru Interiór ne’ebé akompaña hosi Komandante Jerál Polísia Nasionál Timor-Leste (PNTL), Komisáriu Faustino da Costa no Segundu Komandante Jerál, Komisáriu Mateus Fernandes hodi informa situasaun jerál iha territóriu nasionál liga seguransa ba kampaña eleitorál. 

“Primeiru Ministru fó orintasaun atu Polisia Nasionál Timor-Leste kontinua servisu hodi tau matan ba seguransa liuliu ba iha kampaña no eleisaun Prezidensiál, nune’e situasaun bele la’o di’ak nafatin,” Vise Ministru Interiór, António Armindo, hateten ba jornalista sira hafoin ramata enkontru ho Xefe Governu iha rezidénsia ofisiál Faról-Dili, sesta ne’e.

Notísia relevante: PNTL: situasaun iha territóriu nasionál la’o hakmatek

Iha enkontru ne’e, Vise Ministru Interiór relata situsaun jerál iha ámbitu kampaña eleitorál ne’ebé mak daudaun la’o iha territóriu nasionál.

Vise-Ministru Interiór, António Armindo. Imajen Tatoli/Francisco Sony

“Ami mai relata no submete relatóriu ba Primeiru Ministru kona-ba situsaun jerál naturalmente iha Timór laran tomak hahú kampaña dahuluk to’o ohin, ne’ebé buat hotu la’o di’ak, maske iha insidente ki’ik balun akontese, maibé PNTL atua kedan,” Governante ne’e informa.

Nune’e, Xefe Governu husu ba membru PNTL iha territóriu tomak atu respeita ba nia superiór sira hodi asegura eventu demokrátiku ne’e.

“Iha orientasaun ba Komandu PNTL mak atu fó hanoin ba membru sira hotu kontinua mantein disiplina iha hirárkia PNTL nian liuliu tenke respeita ba Komandante sira” Governante ne’e haturan.

Entretantu, Vise Ministru ne’e afirma PNTL laiha kompeténsia bandu labarik minoridade partisipa kampaña eleitorál.

“Polisia laiha kompeténsia atu bandu inan-aman lori nia-oan partisipa iha kampaña.  maibe ida ne’e parte Komisaun Nasionál Eleisaun (CNE, sigla portugés), maka tenke haree hodi husu ba apoiante simpatizante no ekipa susesu sira, kuandu oras kampaña labele lori labarik sira ba tuir kampaña. Maibé inan-aman de’it mak ba hodi rona programa hosi kandidatu atu bele hili iha eleisaun,” nia akresenta.

Notísia relevante: Dezloka ba munisípiu, Komandu PNTL husu membru hatudu disiplina no neutru

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here