Manu DOC (Day Old Chicken) ne’ebe iha Kompañia Gracia Farm. Foto Tatoli/Cidalia Fatima

ERMERA, 17 marsu 2022 (TATOLI)—Kompañia Gracia Farm ne’ebé lokaliza iha Postu Administrativu Railaco, Munisípiu Ermera, labele atinje produsaun másima manutolun hodi responde ba nesesidade nível nasionál, tanba importasaun manu DOC (Day Old Chicken) menus.

Jerente kompañia, Octávia da Costa, informa kompañia ne’e iha tempu bain-bain kada tinan sempre importa manu dala tolu liu husi aviaun no hafoin mosu pandemia Covid-19, kompañia importa de’it dala ida no utiliza aviaun ne’ebé charter.

“Uluk importa manu mai Timor ne’e di’ak hela, ho nune’e  manutolun la menus. Maibé, tama iha janeiru to’o marsu 2022 nia laran manutolun menus tanba manu ne’ebé iha la produtivu ona atu tolun. Manu ne’ebe hatama iha tinan uluk nian tenke fa’an sai hotu depois iha tinan 2020 no 2021 ami hatama manu dala ida de’it. Uluk ami hatama manu kada tinan bele dala tolu, ho nune’e kada fulan tolu ou ha’at hatama tan manu foun”, esplika Octávia da Costa ba Tatoli iha edifísiu kompañia Gracia Farm Railaco, Ermera, kinta ne’e.

Nia hateten, uluk kompañia importa manu DOC husi nasaun Malázia maibé iha tinan haat (4) ikus kompañia importa fali husi Surabaya no Bali Indonézia. Daudaun ne’e prosesu importasaun nafatin halo liu husi aviaun maibé la’o kleur tanba tenke liu husi charter (aluga) la hanesan tempu bain-bain.

“Manu ida ne’e iha Kupang laiha. Produsaun manu TOC iha de’it Surabaya no Bali, Indonesia. Ne’ebé  foin lalais ami sosa  husi Surabaya”, nia aumenta.

Nia dehan, manu DOC ne’e kada halo importasaun  manu 24.000 to’o 35.000 ho folin  husi $2.00 to’o $2.25 kada manu ida. Maibé iha tempu pandemia manu nia folin sa’e ba $3.00 ou liu.

“Foin lalais ne’e tuir loloos atu hatama, maibé tarde ho nune’e foin importa iha fulan  novembru 2021”, jerente ne’e haktuir.

Kompañia Gracia Farm iha tinan 2020 importa manu DOC hamutuk 35.000 maibé daudaun ne’e nia produsaun hahú menus tanba idade manu nian tama ona faze la produtivu.

Iha tempu bain-bain, produsaun manutolun bele atinje kaixa 210 to’o kaixa 275 maibé hafoin importasaun menus iha fulan janeiru mai fevereiru 2022 produsaun tun to’o kaixa 56 kada loron.

Kada loron, nia dehan, iha tempu oras 24 nia laran manu ida fó tolun ida no tarde liu mak oras 32 nia laran. Maibé,  liu ona oras ne’e mak la tolun, maka manu ne’e konsidera la produtivu.

“Manu ne’ebé la produtivu ami tenke fa’an hodi bele hetan netik osan uitoan husi $4 to’o $6. Tanba manu ne’e tenke han hela de’it. Kada loron 120 gram ba kada manu ida. Se karik han maibé la fó tolun ne’e ita lakon tanba hahán manu nian mós importa husi rai liur”, nia haktuir.

Nia hatete, ai-han ba manu DOC nian importa husi Surabaya ho kontentór neen (6) iha kada importasaun. Kada kontentór iha saka 400 ne’ebé saka ida ho folin $50, enkuantu kada loron kompañia bele fó han saka 100 to’o 200 bazeia ba stoke manu iha luhan ne’ebé preparadu.

Iha tinan 2021, kompañia Gracia Farm importa manu DOC hamutuk 45.000 ho nia produsaun foin atinje 10%. Signifika  seidauk másimu tanba idade produsaun nian mak foin semana 18.

“Manu hatama ikus ne’e nia produsaun 10%. Ho nune’e  iha abril mai mak foin prodús to’o 95%”, dehan nia.

Totál manu DOC ne’ebé kompañia Gracia Farm iha hamutuk 70.000 no produsaun hahú sa’e fali ba kaixa 85 to’o 100 hafoin manu DOC importasaun ikus tama ba faze produtivu. Kada kaixa iha manutolun 350 ne’ebé ho nia folin la hanesan, hahú husi $50 to’o $65 bazeia ba tipu medida manutolun nian no bele sosa liu husi  ajensia ofisíal iha Kampung Baru, Komoro Dili.

Notísia relevante: Kompañia Gracia Farm Railaco Apoiu Manu-tolun Kaixa 15 ba CIGC

Jornalista       : Cidalia Fátima

Editora           : Armandina Moniz

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here