DILI, 04 maiu 2020 (TATOLI) – Kompañia Gracia Farm Railaco apoiu manu-tolun kaixa 15 ba Sentru Integradu Jestaun Krize (CIGC, sigla portugés).
Jestór Kompañia Gracia Farm Railaco, Jasmani hateten apoia ne’e nu’udar asaun solidaridade ne’ebé kompañia fó ba CIGC.
“Iha kaixa 15 no iha kada kaixa iha manu-tolun hamutuk 360. Ho apoiu ami-nian espera bele kontribui ho di’ak no ita hotu espera katak COVID-19 ne’e bele hotu lalais”, dehan Jestór Kompañia Gracia Farm Railaco iha Sentru Konvensaun Dili (CCD, sigla portugés), segunda ne’e.
Tuir Jestór ne’e, kompañia ne’e la’ós de’it apoiu ba CIGC maibé ba komunidade kbiit laek balun iha área Comoro no Pantai Kelapa ne’ebé haree ba situasaun Estadu Emerjénsia rasik.
“Ami la’ós apoiu ba iha Sentru Integradu Jestaun Krize rasik maibé antes ne’e ami mós apoiu ona ita-nia maluk balun ne’ebé presiza ami nia tulun”, nia akresenta.
Apoia ne’e simu direita husi Koordenadór ba Unidade Informasaun Públika CIGC, José da Costa.
Jornalista: Natalino Costa
Editora: Julia Chatarina
