Jogadór selesaun nasionál hala’o treinamentu iha estádiu jalan besar Singapura. Imajen/ FTTL

DILI, 17 marsu 2022 (TATOLI)– Adjuntu Sekretáriu Jerál Federasaun Futeból Timor-Leste (FFTL), Frederico Martins, informa hahú kontaktu Federasaun Futeból nasaun rua  hanesan Japaun no Koreia Súl, atu autoriza selesaun nasionál U-23 ba treinu iha sira nia kampu hafoin partisipa iha jogu SEA Games  2022, iha Vietname.

“Ita iha posibilidade sei ba halo “training camp” iha Koreia Súl ou Japaun. Tanba ita halo kontaktu hela ho sira nia federasaun karik sira fó resposta atu ita nia selesaun nasionál U-23 bele ba iha ne’ebá hodi treinu, molok atu ba partisipa iha jogu SEA Games iha Vietname,” Frederico hateten ba Agência TATOLI iha edifísiu FFTL-DILI, kinta ne’e.

Notísia relevante:   FFTL hahú prepara ekipa futeból partisipa SEA Games

Razaun FFTL hili nasaun rua ne’e atu ekipa Lafaek ba halo “training camp” tanba kondisaun ba jogadór sira hala’o treinamentu iha ne’e la másimu liuliu hanesan kampu no hela fatin ba jogadór sira.

Tanba ne’e, FFTL hili nasaun rua ne’e atu bele fasilita jogadór sira ba hela no mós iha posibilidade bele hala’o jogu amigavel ho klube primeira divizaun no segunda divizaun sira iha nasaun rua ne’e atu bele koko forsa hafoin partisipa iha Sea Games.

“Úniku solusaun mai FFTL mak jogadór sira ba hala’o treinamentu iha rai liur tanba ita nia kondisaun la másimu, maibé problema ida ba ita mós mak ne’e aviaun ladun semo ba mai, entaun ami tenta hela iha abríl nia klaran.  Nune’e ita nia jogadór sira bele arranka ona ba rai-liur hodi halo “training camp” antes ba Vietname,” nia dehan.

Meiu seluk ne’ebé FFTL sei halo bainhira Koreia no Japaun la autoriza selesaun nasionál mak sira sei kontaktu fali ba Vietname atu halo “training camp”.

“Dalan laiha ikus liu mak ita sei kontaktu fali ba Vietname atu ita bele ba iha ne’ebá,” nia relata.

Daudaun ne’e, ekipa selesaun hala’o hela treinamentu kada loron iha kampu FFTL Dili ne’ebé lidera hosi treinadór prinsipál Fabio Maciel.

Totál ba jogadór hamutuk na’in-27 mak daudaun ne’e prepara hela atu ba kompete iha SEA Games hodi reprezenta Timor -Leste.

Molok, prepara ba SEA Games ekipa refere hatudu ona prestasaun di’ak iha jogu AFF Cup 2022 iha Cambodia, iha ne’ebé Timor -Leste konsege okupa iha terseiru lugar iha jogu ne’e.

Hosi kbiit ne’ebé Timor-Leste iha la dúvida atu ba partisipa iha Sea Games tanba realidade hatudu ona ekipa Lafaek mós bele no konsege doko ona nasaun jigante sira iha ASEAN.

Notísia relevante:  FHTL hahú prepara atleta na’in-tolu ba partisipa Sea Games

Jornalista : Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here