Sea Games iha Vietname. Imajen/espesial

DILI, 31 janeiru 2022 (TATOLI)— Adjuntu Sekretáriu Jerál Federasaun Futeból Timor-Leste (FFTL), Frederico Martins, informa ekipa futeból hahú preparadu atu ba kompete iha jogu rejionál SEA Games ne’ebé sei hala’o iha Vietname, iha fulan-maiu.

“Ita preparadu hela ekipa ne’ebé atu ba partisipa iha SEA Games ne’e mak U-23. Daudaun sei ba partisipa uluk iha jogu AFF CUP, hafoin fila-fali mai la deskansa, maibé kontinua mantein treinamentu atu ba partisipa fali jogu iha SEA Games nian,” Adjuntu SekJer ne’e, hateten ba Agência TATOLI iha edifisiu FFTL Dili, segunda ne’e.

Notísia relevante: FTTL prepara atleta na’in-hitu bá kompete iha SEA Games

Adjuntu Sekretariu Jerál FFTL, Frederico Martins. Imajen Tatoli/ Hortencio Sanches

Nia dehan, preparasaun selesaun nasionál nian másimu tebes, nune’e FFTL tenta hela kontaktu nasaun tolu hanesan Korea Súl, Japaun no Qatar atu ekipa Timor-Leste halo jogu amigavél hodi koko forsa, molok ba partisipa iha jogu SEA Games.

Orsamentu ba partisipa iha SEA Games ne’e, Governu liuhosi Sekretáriu Estadu Juventude no Desportu (SEJD) mak apoia. Enkuantu FFTL mós sei hasai rasik osan balun hodi halo kompleta bainhira orsamentu la sufisiente.

“Osan mai hosi Governu maibé ita sei haree, Governu haruka ba Konfederasaun Desportiva Timor -Leste (CDTL-sigla portugés) mak aloka fali ba ami la hatene hira mak sei haruka mai ami hein de’it,” nia dehan.

Iha semana kotuk, SEJD transfere ona orsamentu hamutuk $81.000 ba CDTL atu aloka ba modalidade ualu ne’ebé atu ba partisipa iha SEA Games 2022.

Modalidade ualu ne’ebé sei reprezenta Timor -Leste mak hanesan, Taekwondo, Karate-do, Boxe, Atletizmu, Natasaun, Voleból Praia, Futeból no Sky. Nune’e futeból sei reprezenta jogadór hamutuk na’in-22.

Notísia relevante: TL la konsege konkista vitória iha jogu amigavél kontra Indonezia

Jornalista : Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here