Ekipa CVTL halo fomigasaun ba atuasaun kazu dengue iha bairo Becusi Sentral, loron kinta (20/01). Imajen Tatoli/Francisco Sony

DILI, 16 marsu 2022 (TATOLI)— Diretór Ezekutivu Servisu Autónomu Medikamentu no Ekipamentu Saúde (SAME), Santana Martins, husu ba fasilidade saúde liuliu postu saúde no sentru saúde sira ne’ebé presiza estoke aimoruk fumigasaun no abate bele hato’o pedidu hodibele distribui atu bele prevene surtu dengue iha Timor-Leste.

“Abate no malation ne’ebé mak governu halo akizasaun to’o ona ita-nia rain, nune’e ami atu distribui ba fasilidade saúde depende ba pedidu ne’ebé mak sira hatoo mai iha SAMES. Tanba ne’e ami sei koordena ho Diresaun Saúde Públika Ministériu Saúde atu halo oinsá ami distribui ba fasilidade saúde,” Diretór Ezekutivu SAMES ne’e hateten ba Agência TATOLI iha nia knaar fatin Kampu Alór-Dili, kuarta ne’e.

Notísia relevante:    Dengue hamate labarik na’in-35 no pasiente sa’e ba 3.026

Aimoruk abate no fumigasaun ne’ebé Governu halo akizasaun ne’e liuhosi prosesu naruk tanba haree ba situasaun COVID-19, maibé konsege to’o Timor-Leste.

Kuantidade fumigasaun hamutuk litru 1.600 no aimoruk abate hamutuk litru 1.000, nune’e SAMES sei halo distribuisaun ba munisípiu 12 no Rejiaun Administrativu Espesiál Oé-Cusse no Ambeno (RAEOA) ho baze ba pedidu distribuisaun.

Ministériu Saúde liuhosi SAMES halo kontratu ho kompañia Australianu atu sosa malation no abate ho orsamentu $51.000.

Servisu Autónomu Medikamentu no Saúde (SAMES) kontrata kompañia South Austral. PTY LTD, hosi Austrália halo akizasaun ba aimoruk kímiku fumigasaun no abate ho montante $51.000

Pasiente dengue sa’e ba 3.146

Tuir dadus hosi Ministériu Saúde hatudu kazu dengue iha Timor-Leste hahú hosi janeiru mai to’o horiseik hamutuk kazu 3.146 no kumulativu óbitu na’in 35.

Maioria kazu ne’e deteta husi Munisípiu Dili ho totál 2.091 Baucau 125, Manatuto 164, Covalima 114, Ermera ho kazu 90, Manufahi 133 Viqueque 57, Ainaro 43, Liquiça 92, Aileu 85 no Bobonaro 42, Lautem 110 no RAEOA na’in-tolu.

Munisípiu Dili nafatin rejista kazu ne’ebe a’as iha primeira semana   desimu primeiru semana fulan fevereiru 2022, ho totál kazu 2.091.

Apela ba populasaun

Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Notísia relevante: MS-OMS lansa matadalan nasionál ba jestaun klínika surtu dengue

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here