Reprezentante Organizasaun Mundiál Saúde (OMS), Arvind Mathur entrega dokumentu matadalan jestaun ba kombate dengue iha Timor-Leste ba Ministra Saúde, Odete Maria Freitas Belo no Diretora Jerál Prestasaun Servisu Saúde, Odete da Silva Viegas. Iha salaun Novu Turismu, segunda (07/03). Imajen Tatoli/Francisco Sony

DILI, 07 marsu 2022 (TATOLI)—Minsitériu Saúde (MS) hamutuk ho Organizasaun Mundiál Saúde (OMS) halo lansamentu matadalan nasionál ba jestaun klínika surtu dengue iha Timor-Leste.

Biban ne’e, Ministra Saúde Odete Maria Freitas Belo, hateten konteúdu iha livru matadalan nasionál ba jestaun surtu dengue atu médiku sira halo analiza kazu hosi ema nia-rain hodi  kompara ho kazu iha Timor-Leste.

“Tanba tratamentu ba klasifikasaun moras dengue ne’e atu fasilita ita-nia médiku sira atu halo tratamentu ba kazu dengue kamaan, moderadu no grave. Ita hakarak fasilita médiku sira halo tratamentu tuir tipu moras ne’ebé pasiente sira enfrenta,” Ministra Saúde hateten hafoin ramata lansamentu  matadalan  nasionál  ba jestaun klínika dengue iha Novo Turizmu-Liecidere, segunda ne’e.

Durante ne’e, Governante ne’e dehan laiha tratamentu espésifiku ba kazu dengue tanba aimoruk ba dengue ne’e laiha, maibé  ida ne’e espesiál ba médiku sira oinsá mak tau matan ba pasiente  hodi observa no tenke tau soru, sé isin manas fó aimoruk paracetamol  hodi hatun manas.

Iha fatin hanesan, Reprezentante Organizasaun Mundiál Saúde, Arvind Mathur, hateten OMS lansa daudaun matadalan nasionál ba jestaun klínika dengue.

Nune’e, OMS sente kontente katak hafoin lansamentu ne’e, iha ona programa orientasaun no treinamentu ne’ebé kle’an ba klínika sira hosi HNGV, ospitál referál, rejionál, no sentru saúde sira hosi munisípiu oioin.

“Nu’udar ita-nia parseiru ne’ebé konfiavel no fiar-na’in, OMS komprometidu atu asegura apoiu tékniku ne’ebé ho kualidade aas ba Ministériu saúde hodi realiza vizaun nasaun ida-ne’ebé livre husi moras hada’et. Ha’u garante ba imi katak ekipa OMS sei la’o hamutuk ho imi no povu Timor-Leste atu realiza vizaun timor-oan saudavél iha Timor-Leste,” nia akresenta.

Notísia relevante:Surtu dengue: óbitu na’in-33 no pasiente sa’e ba 2.555

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here