Mota sobu hariis fatin no sala aula turma komérsiu, iha Eskola Ensinu Sekundáriu Tékniku Vokasionál Hera. Imajen TATOLI/Tomé Amado

DILI, 16 marsu 2022 (TATOLI)–Diretór Eskola Ensinu Sekundáriu Tékniku Vokasionál (ESTV) Hera, Francisco da Costa Fernandes, relata katak Ministériu Edukasaun Juventude no Desportu (MEJD) to’o agora seidauk halo intervensaun imediata ba kondisaun eskola Hera ne’ebé mota sobu iha semana hirak liubá.

“Ami-nia prosesu ensinu aprendizajen ba estudante sira kontinua la’o, maibé ami halo semana sim semana não, tanba ami labele garante kondisaun estudante no profesór sira-nian to’o oras ualu nia laran,” Diretór eskola informa ba Agência TATOLI, via telefónika, kuarta ne’e.

Notísia relevante: MEJD husu Eskola Tékniku Vokasionál Hera reativa aula prezensiál

Tuir Responsável eskola ne’e, desde inísiu bainhira eskola ne’e hetan ameasa hosi mota-boot Ministru Edukasaun Juventude no Desportu, Arminda Maia, ho ninia ekipa halo kedan observasaun direta hodi haree kondisaun eskola.

Aleinde ne’e, Diretór Nasionál Ensinu Tékniku Vokasionál halo tan enkontru ho parte eskola no promete sei apoiu hodi garante prosesu ensinu aprendizajen ba estudante sira.

“Maibé to’o agora apoiu sira ne’e seidauk to’o de’it mai,” nia akresenta.

Ba kestaun ne’e, Diretór eskola halo nafatin kontaktu ho parte MEJD atu husu konfirmasaun kona-ba atu hadi’a eskola.

Tanba ne’e eskola deside prosesu aula prezensiál ba estudante sira kontinua la’o, maibé la tuir ona oras normál, atividade semana sim semana não ho oras rua ho balun de’it, hahú tuku 08:00 to’o tuku 10:30 no parte lorokraik laiha atividade.

Enkuantu, kondisaun sala aula hosi Departamentu Komérsiu daudaun ne’e la uza totál, hela de’it Departamentu Kontabilidade maka sei uza maibé ninia kondisaun espasu mós falta de’it 40cm to’o 50cm para mota sobu ona tatis eskola nian.

Antes ne’e, iha segunda (21/02), akontese udan boot no inundasaun, ne’ebé mota tun ho volume maka’as konsege sobu sala aula ida ho hariis fatin eskola, tanba ne’e iha momentu ne’ebé kedan Dirijente ESTV Hera hola inisiativa rasik suspende atividade aprendizajen estudante 175 tanba eskola tama iha kondisaun risku dezastre naturál.

Totál estudante ESTV Hera hamutuk 175, kompostu hosi departamentu komérsiu 10o ano iha 26, 11o ano iha 18 no 12 o ano iha 23,  ba kursu akontablidade iha 39, 11o iha 37 no 12o ano iha 32.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here