Mota sobu hariis fatin no sala aula turma komérsiu, iha Eskola Ensinu Sekundáriu Tékniku Vokasionál Hera. Imajen TATOLI/Tomé Amado

DILI, 03 marsu 2022 (TATOLI)—Diretór Nasionál Ensinu Sekundáriu Tékniku Vokasionál hosi Ministériu Edukasaun Juventude no Desportu (MEJD), Luís Manuel da Costa Fernandes, husu Dirijente Eskola Ensinu Sekundáriu Tékniku Vokasionál (ESTV) Hera atu reativa fali aula prezensiál tanba kondisaun normál ona.

“Eskola suspende maibé provizóriu de’it tanba loron-rua tuir malu ne’e la udan ona no la’o normal fali ona, ha’u hanoin eskola tenke retoma pozisaun hodi hahú filafali aula prezensiál ba estudante sira,” Diretór informa ba Agência TATOLI, iha ninia knaar fatin, Villa verde, kinta ne’e.

Iha segunda (21/02), akontese udan boot no inundasaun, ne’ebé bainhira mota tun ho volume maka’as konsege sobu sala aula ida ho hariis fatin eskola, tanba ne’e Dirijente ESTV Hera hola inisiativa rasik suspende atividade aprendizajen estudante 175 tanba eskola tama iha kondisaun risku dezastre naturál.

Notísia relevante: Dirijente Eskola Tékniku Vokasionál Hera suspende atividade aprendizajen

Tuir  Diretór Nasionál ne’e, parte ministériu sei foti desizaun iha tempu badak relasiona ho apoiu atu hadi’a infraestrutura eskola ne’ebé hetan estragu.

“Agora hein de’it desizaun hosi Ministru Edukasaun Juventude no Desportu nia esforsu iha tempu besik atu buka rezolve situasaun sira-ne’e, liuliu kona-ba tanke apoiu bee-moos no haris fatin ba eskola,” nia akresenta.

Enkuantu, Adjuntu Diretór ESTV Hera, Anselmo Freitas, hateten katak parte eskola sei buka rezolve uluk hariis fatin no tanke ba bee-moos inklui hariis fatin.

“Hirak ne’e iha ona maka foin bele hahú filafali aula prezensiál ba estudante sira,” nia dehan.

Totál estudante ESTV Hera hamutuk 175, kompostu hosi departamentu komérsiu 10o ano iha 26, 11o ano iha 18 no 12 o ano iha 23,  ba kursu akontablidade iha 39, 11o iha 37 no 12o ano iha 32.

Jornalista : Tomé Amado

Editora      : Julia Chatarina      

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here