Kandidatu Prezidente Repúblika períodu 2022-2027, Antero Benedito da Silva. Imajen TATOLI/Vitorino Lopes da Costa

DILI, 16 marsu 2022 (TATOLI)–Antero Benedito da Silva, kandidatu Prezidente Repúblika ba periódu 2022-2027 ho númeru sorteiu 10, hili lema Estadu foun, jerasaun foun.

Antero Benedito da Silva hato’o nia polítika ne’ebé enfaze ba ‘popularizasaun demokrasia’ ho objetivu promove partisipasaun direta povu nian iha konsultasaun no desizasaun deliberativu prezidente nian.

Notísia Relevante: Sai Xefe Estadu, Antero propoin ba Governu fó prioridade ba agrikultura

“Ne’e nu’udar reforma polítiku demokrasia ne’ebé sei hadi’a povu nia moris di’ak no dezenvolvimentu Estadu foun ne’ebé libertadór”, katak kandidatu ne’e iha ninia kampaña.

Nia kompromete, bainhira eleitu sei kria forum permanente ho toos-nain no komunidade hodi rona sira-nia preokupasaun no opiniaun ba lei orsamentu jerál Estadu.

“Liu husi konsulta ne’e mak sei sai baze ba Prezidente Repúblika hodi promulga ou veta orsamentu jerál ne’ebé la pro ba povu kamponez, aileba, traballadór no sidadaun sira iha jerál”, afirma.

Notísia Relevante: Kampaña iha Viqueque, Kandidatu PR Antero tau prioridade ba estrada

Biografia

Antero iha tempu ukun án

Hafoin vitória populár hakotu okupasaun Indonézia nian, Antero Benedito da Silva, asume kargu oi-oin iha Organizasaun Nasoins Unidas (ONU), Estadu Repúblika Demokratika Timor-Leste (RDTL) no Sosiedade Sivíl; Funda organizasaun Institutu Kdadalak Sulimutuk Institutu no sai Direitór 2000-2001; Prezidente Konsellu Diretivu Forum Organizasaun Naun Govermentál Timor-Leste (FONGTIL) 2001-2002.

Indika husi Sekretáriu  Jerál ONU, Kofi Anan, sai nu’udar Membru Konsellu Eleitorál ba Eleisaun Prezidensiál 2002; Membru Konsellu Diretivu ba Planu Estratejiku Dezenvolvimentu Nasionál (UNTAET) hamutuk Lider Kay Rala Xanana Gusmao, Marí Alkatiri no Mgr. Basilio do Nascimento 2001-2022.

Membru Konsellu Konsultivu Fundu Petroliferu nu’udar órgaun Konsultivu ba Komisaun C Parlamentu Nasionál 2008-2012; durante tinan 20 ikus ne’e, tenta dedika-an no ativista, edukadór no organizadór ne’ebé dezenvolve Mauberismu nu’udar filosofia polítika no sosiál ne’ebé tulun Timoroan luta ba nia libertasaun totál no kompletu. Hahú tinan 2006 ate agora servisu permanente nu’udar Dosente iha Departamentu Dezenvolvimentu Komunitáriu, Fakuldade Siénsia Sosiál, Universidade Nasionál Timor Lorosa’e (UNTL).

Kona-ba Antero

Antero Benedito da Silva, moris loron 30 Abril 1968, husi família simples iha Knua BinaUaidora-Manume, husi Aman Agostinho da Silva no Inan Maria Bendita. Antero Benedito da Silva, ne’ebé iha tempu rezisténsia kontra okupasaun Indonézia nian, uza kodigu “WeAnin Moris/W-Moris, nia sei halo buat ruma. We-be rekursu no simbolu vida; inspira husi knua bei-ala sira Uaidora, be-siak ka be kadoras; We-anin naran ba lokalidade ida iha área Bekora nian.

Anin (oksijente) nu’udar elementu prinsipál ida natureza nian. Antero Bendito nian maun alin nain haat, seluk mak Anacleto Bendita da Silva (militar Indonézia sira lori lakon 1999); David Bendito da Silva (involvidu iha rezisténsia no falecido 2014), Aguida Bendita da Silva (kaben iha Maukali Gariuai); Maria Bendita da Silva (mate iha matebian durante funu 1977).

Luta klandestina

Hafoin hakat situasaun ne’ebé difisil, tanba hamlaha, no bombardeamentu inimigu nian iha baze apoiu Matebian 1976-1978, Antero Benedito hasoru esperiénsia moris ne’ebé mistura entre haksolok no tristeza iha zona okupadu sira iha Uato-Carbau.

Estafeta hodi tau matan no halibur ba FALINTIL no lider FRETILIN sira ne’ebé inimigu kaer no kastigu iha Uato-Carbau, no nia halai sai husi knua loron 21 Abril 1984 tanba kapturasaun massal no masakre husi militár Indonézia hasoru família sira iha área neeba. Entre 1987-1988 hahú involve iha Grupu diskusaun informál sira inklui ho orfanato sira husi Atauru iha eskola, partisipa iha programa Youth Exchange ba Canada hodi koñese malu ho kolega Externato São José sira, no involve iha organizasaun klandestina HPP-MAI (Himpunan Pemuda Pelajar Mahasiswa Anti-Indonézia), 1988.

Hafoin masakre Santa Cruz

Hafoin, masakre 12 Novembru 1991, nia sai husi Timor, no frekuenta formasaun relijioza nian iha Canossian Formation House, iha New Manilia; no frekuenta baxarelatu iha área Filozofia, no kontinua involve iha servisu sesretu ba auto-determinasaun liuhusi plataforma HPPMAI/LENAT (Liga Estudantil Nationalista de Timor-Leste), no involve iha Konferénsia APCET (Asia Pacific Coalition for East Timor) ne’ebé organiza husi Konsellu Nasionál da Resistência de Maubere (F/C.N.R.M) no ativista solidariedade sira 29 Maiu-01 Juñu 1994 iha Universidade Filipina.

Assume responsabilidade nu’udar reprezentante LENAT-C.N.R.M no servisu iha sentru formasaun nu’udar ‘internship’ APCET/IID iha Manila Filipina; voluntariu iha Peaple’s Church of the Philippines (PCPR) ho kampañe auto-determinasaun Povu Maubere nian; kontribui ba estabelesementu Philipines Solidarity for East Timor (PhILSETI) iha Manila Filipina 1994.

Tanba ajustamentu estratejia, mak fila hikas mai Timor iha Dezembru 1994, no tinan 1995, hahú frekuenta fali eskola nu’udar estudante siénsia governasain iha Fakuldade Sosiál Polítika (FASPOL) iha Universitas Timor-Timur (UNTIM).

Tulun re-organiza movimentu klandestina sira, liu-husi estabelesementu koletivu ba rede GERIPOTA (Guerilla Politika Oan Timur Aswain) nu’udar nukleu iha Organizasaun Rezisténsia Sagrada Família, no harii OSKTL (Organizasaun Solidariedade Klosan Timor Lorosae) ne’ebé servisu direta ho APCET iha Manila.

Servisu nu’udar Ofisial ba programa Dezenvolvimentu Komunitáriu ho Caritas Austrália no Caritas Dili entre 1997-1998. Involve iha estabelementu ultima organizasaun rezisténsia, Dewan Solidaritas Mahasiswa Pemuda dan Pelajar Timor Lorosa’e (DSMPPTL), eleitu Koordenadór Jerál DSMTT/DSMPPTL hodi organiza kampañe ba referendu entre 1998-1999.

Reprezenta DSMPPTL hodi hasoru malu ho Diplomata Embaixadór Torica, Uniaun Europeia iha otél Mahkota Juñu 1998; ho apoiu Mgr. Carlos Filipe Ximenes Belo, Bispo Apostoliku Diozese Dili, hasoru malu ho Reprezentante Espesiál Sekretáriu  Jerál ONU nian Jamzhed Marker no Tamrat Samuel iha Baukau 19 Jullu 1998. Assume responsabilidade nu’udar kuadru ikus Membru Komite Diretiva da F/C.N.R.M 1998, indika husi reuniaun Komite Diretiva FRETILIN lidera husi Ma’Huno no Ma’Hudo; Membru Suplente CCF 1998.

Notísia Relevante: https://www.youtube.com/watch?v=i8Fb8RL6xSw

Jornalista       : Rita Almeida

Editór             : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here