Kandidatu Prezidente Repúblika Tinan 2022-2027, Anacleto Bento Ferreira. Imajen Tatoli

DILI, 16 marsu 2022 (TATOLI)–Anacleto Bento Ferreira, nu’udar kandidatu Prezidente Repúblika períodu 2022-2027 hakarak hatuur Lei ho interpretasaun jurídika la’ós ho interpretasaun polítika.

Notísia Relevante: PDRT rejista ona Anacleto Bento iha Tribunál Rekursu

Kandidatu hosi Partidu Demokrátiku Repúblika Timor (PDRT) ne’e haree katak durante inserteza polítiku iha rai-laran tanba interpretasaun polítika ba Lei barak-liu.

Tanba ne’e, bainhira povu fó fiar sai Prezidente Repúblika ba períodu 2022-2027 sei hatuur ho loloos lei sira tuir interpretasaun jurídika.

“Tempu to’o ona, hamutuk ho ha’u, ita tane-aas no halulik fila-fali Lei inan, nune’e hatuur Lei ho interpretasaun jurídika la’ós ho interpretasaun polítika,” Anacleto Bento hateten durante hala’o kampaña eleitorál.

Programa importante ne’ebé kandidatu PDRT ne’e introdús mak reforsa liután Governu iha relasaun internasionál.

Nune’e mós buka dalan hodi ajuda moderniza instituisaun defeza seguransa no apoia maka’as liután órgaun ezekutivu iha prosesu dezenvolvimentu nasionál.

Razaun prinsipál ne’ebé halo Anacleto Bento Ferreira kandidata-aan ba Prezidente Repúblika, tanba nu’udar jerasaun kontinuadora no apoia hosi jerasaun mileniál nomoos povu kiik terus na’in barak hosi aldeia to’o kapitál.

“Ha’u iha obrigasaun hatuur fila-fali Timor-Leste iha estadu direitu demokrátiku loloos. Ha’u hakarak kaer-metin espíritu lutadór no unidade juventude nian hodi hatutan no armoniza prosesu tranzisaun podér polítiku hosi jerasaun tuan ba jerasaun foun,” nia dehan. 

Kandidatu Anacleto Bento hakarak lori valór polítiku iha tempu rezisténsia nian ba palku polítiku atuál hodi kontribui ba prosesu konstrusaun estadu.

Biografia

Anacleto Bento Ferreira moris iha loron 14 fulan-dezembru 1971, iha ospitál Maternidade Dr. António Carvalho, Lahane, Dili. Oan hosi Paulo Ferreira no Cecília da Costa Garcia Bento.

Hela fatin atuál oras ne’e iha aldeia Funu Hotu, suku Kuluhun, postu administrativu Cristo Rei, munisípiu Dili.

Anacleto nia aman nu’udar tropa iha tempu ezérsitu portugés, ne’ebé mai hosi aldeia Uabe, suku Atara, postu administrativu Atsabe, munisípiu Ermera.

Anacleto nia inan nu’udar profesora portugeza, husi aldeia Ailele-hun, suku Kamea, postu administrativu Cristo Rei, munisípiu Dili.

Anacleto nia aman nu’udar militante Partidu FRETILIN iha tempu invazaun iha rejiaun Ermera nian maibé mate iha kombate tanba nia kna’ar militár-patriotizmu.

Anacleto nia inan rekrutada hosi Governu Indonésia nu’udar profesora, termina nia peregrinasaun iha mundu, iha dezembru tinan 1991, tanba sofre hakfodak boot hosi akontesimentu Masakre Santa Cruz.

Anacleto nu’udar Fundadór no Sekretáriu-Jerál dahuluk ba Organizasaun FITUN, ne’ebé mak organiza no partisipa hotu iha manifestasaun ne’e.

Liutiha akontesimentu Masakre Santa Cruz, Anacleto termina tiha ona eskola sekundária  iha SMA Negeri I Dili, hetan Bolsa-de-Estudo hodi ba kontinua estudu iha Fakuldade Direitu, Universidade Katólika Widya Karya Malang, Indonézia.

Durante estudu, Anacleto sadere-aan ba organizasaun RENETIL hodi kontinua fó kontribuisaun ba luta libertasaun.

Iha tinan 1994, hola-parte iha organizasaun no partisipasaun iha demonstrasaun iha embaixada Estadu Unidu Amérika (EUA) nia oin, iha Jakarta, hodi komemora loron akontesimentu Masakre Santa Cruz ne’ebe koinside loos ho loron abertura simeira APEC iha Bogor, Indonézia.  Asaun demonstrasaun ne’e kulmina ho pedidu azilu polítiku ba Portugál.

Durante moris iha Portugal, Anacleto simu kna’ar nu’udar reprezentante RENETIL iha Zona Norte, Portugál hodi kontinua luta iha frente diplomátika. Kna’ar ne’e rasik mak loke dalan koñese no partisipa iha luta diplomátika ne’ebé líder istóriku Timor-oan lubuk oan ida hala’o hela iha rai-li’ur, hahú kedas hosi tinan 1975.

Iha momentu ne’ebá, Anacleto sai nu’udar delegadu ida iha Konvensaun Peniche ne’ebé Conselho Nacional da Resistência Maubere (CNRM) nakfilak-an ba Conselho Nacional da Resistência Timorense (CNRT).

Esperiénsia iha rai-li’ur loke dalan mai ba nia hodi aprende moris iha ambiente demokrátiku no konvivénsia multikulturál.

Hafoin hetan tiha vitória liuhosi referendu, Anacleto hamutuk ho juventude barak iha Portugál, sees-an ba Reinu Unidu hodi hala’o vida profisionál no adquire experiénsia foun, nu’udar bukae atubele fila mai Timor-Leste.

Anacleto aprende lian Inglés no hasai kursu komputasaun ho grau Higher National Diploma-HND iha Bristol University, Reinu Unidu.

Anacleto fila ba Timor-Leste iha tinan 2008 no hala’o kedas kna’ar nu’udar dosente ba matéria kona-ba informasaun no teknolojia iha Instituto Nacional da Administração Publica (INAP).

Liutiha fulan 8, hetan kna’ar foun husi World Bank nu’udar National Consultant hodi apoia ba Governo IV iha Ministériu Saúde liuhosi programa Hospital Support Strategic Plan-HSSP.

Sees-aan hosi pozisaun ne’e, asume kedas kna’ar foun nu’udar IT Officer iha United Nation Population Fund-UNFPA hodi apoia Direção Nacional das Estatísticas hodi organiza Sensu Nasional iha tinan 2010.

Termina ho susesu organizasaun Sensu ne’e, hetan kna’ar foun iha United Nation Devolpment Program (UNDP) hodi hetan formasaun no preparasaun ba fundasaun ekipa transkrisaun dahuluk iha Timor-Leste, iha Parlamentu Nasionál.

Wainhira hala’o hela kna’ar tékniku iha Parlamentu Nasionál, hetan oferta hosi Sekretaria Estadu Meiu Ambiente hodi lidera gabinete no ikus mai hetan fiar hodi sai asesór ezekutivu ba ministru iha Ministériu Komérsiu, Indústria no Ambiente no tuir mai iha Ministériu Estadu ba Asuntu Sosiál no Ministériu Edukasaun.

Mandatu V Governu Konstitusionál nian termina, Anacleto selesionadu nu’udar Sekretáriu Jerál ba Cruz Vermelha de Timor-Leste (CVTL) to’o 31 marsu 2021.

Jornalista : Evaristo Soares Martins

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here