Isabel da Costa Ferreira, apoiu bolseiru Napoleão Barros. Dokumentasaun Tatoli/Francisco Sony

DILI, 16 marsu 2022 (TATOLI)–Kandidata Prezidente Repúblika ba periódu 2022-2027 ho númeru sorteiu ida (1), Isabel da Costa Ferreira, hatete atu dezenvolve família no Nasaun moris iha armonia no saudavel, timor-oan hotu tenke sai hosi kiak ho ninia dalan mak investe ba área edukasaun.

“Atu hasai timor-oan hosi situasaun kiak, dalan úniku mak edukasaun,” nia afirma.

Nia hatutan, timor-oan sei kiak nafatin bainhira kontinua moris iha analfabetu nia-laran. Tanba ne’e, tempu ona atu timor-oan hotu ko’alia kona-ba libertasaun povu hosi kiak.

Kandidata ne’e mai ho vizaun simples no ambisiozu mak promove fiar, hametin família no Nasaun. “Família ida armonia no saudavel mak ita bele dezenvolve Nasaun ho di’ak. Se família la organiza án ho di’ak, fraku, Nasaun kontinua frajil”, dehan nia iha kampaña sira.

Notísia  Relevante: Isabel Ferreira hakarak transforma mentalidade família

Nia husu ba jerasaun foun hanesan futuru Nasaun-nian, tenke hahú ona tau preokupasaun ba rai ida-ne’e no família, nune’e bele dezenvolve Nasaun ho di’ak tuir ema hotu nia mehi no importante liu mak povu tenke sai sujeitu ba prosesu hotu ne’ebé liga ba dezenvolvimentu nasionál.

Notísia Relevante: Isabel Ferreira hakarak povu moris iha pás no estabilidade

Biografia

Isabel da Costa Ferreira, espoza hosi atuál Primeiru-Ministru, Taur Matan Ruak, ne’ebé moris iha Same, munisípiu Manufahi hosi aman Mateus Ferreira no inan Ana Flora de Jesus Ferreira, hosi munisípiu ne’ebé Don Boaventura halo revolta hasoru kolonializmu portugés.

Alumni Universidade Nasionál Denpasar, Bali, Indonézia ne’ebé termina ninia lisensiatura direitu iha 1998, ho maun-alin hamutuk 13, hahú kareira profisionál ba kestaun sira ne’ebé liga direitu ema-nian, liu-liu violasaun ne’ebé komete hosi militár Indonézia durante okupasaun.

Inan ho oan na’in-tolu (3) ne’e moris iha loron 15 fulan-abríl 1974, asume responsabilidade hanesan koordenadora jerál ba organizasaun la’ós governu-nian ho naran Kontras Timor-Timur iha 1998 no 1999, asume mós kargu hanesan diretora ba Komisaun Direitu Humanus Timor Lorosa’e (CDHTL, sigla portuges) iha 1999-2021.

Autora ida hosi ema nain 88, ne’ebé elabora konstituisaun Repúblika Demokratika Timor-Leste hosi lista partidu Uniaun Demokrata Timorense (UDT), eleitu nu’udar membru asembleia konstituante iha 2001.

Depois restaurasaun independensia, iha tempu tranzisaun administrativa Nasaun Unida iha Timor-Leste (UNTAET), espoza eis Prezidente Repúblika dalima iha periódu 2012-2017 ne’e nu’udar vise prezidente Cruz Vermelha Timor-Leste (CVTL) hosi 2002–2005, hanesan asesora direitu ema-nian ba primeiru-ministru hosi 2002–2006, asume mós knaar importante iha governasaun nu’udar, vise ministra ba justisa iha agostu–dezembru 2006, no membru komisaun verdade no amizade (CVA, sigla portugés) iha 2005–2008.

Espoza eis prezidente repúblika ba datoluk ne’ebé eleitu demokratikamente ne’e, hetan konfiansa hanesan prezidente sekretariadu ba apoiu komisaun ba promosaun PNTL hosi 2009 – 2010, iha 2011 – 2014 hanesan komisaria ba funsaun públika.

Isabel Ferreira, iha 2009-2015 hanesan asesora juridika ba sekretariu estadu seguransa-nian, iha fevereiru 2015-20 maiu 2015 hanesan asesora juridika ministeriu interior, konselleiru ministru edukasaun no advogada ba labarik iha setembru 2015-agostu 2017 no asesora ba sekretaria estadu ba protesaun sivil hosi agostu 2018 to’o agora.

Inan hosi Lola, Tamarisa no Quesadhip ne’e hatene lian tetun, portugés no indonézia no komprinde lian inglés.

Esperensia servisu seluk mak: xefe gabinete ba servisu eis prezidente repúblika, major jeneral Taur Matan Ruak hosi juñu 2017-juñu 2018, prezidente komisaun estraordinaria ba promosaun PNTL hosi 2012 – marsu 2014, membru asembleia konstituante setembru-outubru 2001.

Esperensia organizasaun no institusionál, Prezidente ba Komité Paralímpiku nasionál Timor-Leste, hosi 26 abril 2019-2021, Fundadora Centro Quesadhip Ruak, 2012-2021 no esperensia lubuk hahú hosi instituisaun Estadu no organizasaun sosiedade sivil. Nune’e mos partisipa eventu oin-oin hanesan partisipante no oradór prinsipál iha semináriu sira no konferénsia internasionál sira ne’ebé akontese iha rejiaun Ázia, Eropa, no Austrália.

Kandidata Prezidente Repúblika periódu 2022-2027 númeru sorteiu 1 ho mehi ida ba dame, estabilidade no moris di’ak ba povu no rai ne’e.

Notísia Relevante: https://www.youtube.com/watch?v=h2DfocGAm60

Jornalista       : Rita Almeida

Editór             : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here