Sekertáriu Estadu Formasaun Profisionál no Empregu (SEFOPE), Alarico do Rosário. Imajen TATOLI/Francisco Sony

DILI, 15 marsu 2022 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), tersa ne’e, realiza seremónia despedida no asina deklaraun ho família traballadór na’in-98, kompostu hosi mane 62 no feto  36, ne’ebé tuir planu kuarta (16/03), na’in-92 sei aranka uluk bá serbisu iha Austrália.

Durante seremónia Sekretáriu Estadu Formasaun Profisionál no Empregu, Alarico do Rosário, enkoraja joven timor-oan ne’ebé hetan ona oportunidade, atu hatudu nafatin komportamentu di’ak no kumpre kompromisiu ne’ebé halo ona, hanesan labele ses-an hosi sistema, nune’e empregadór bele emprega tan joven sira ne’ebé hein hela oportunidade serbisu.

“Deklarasaun ne’ebé ohin ita halo hanesan tradisaun ida bainhira traballadór atu bá serbisu iha Koreia Súl ka Austrália. Signifika parte Governu no família sira prontu husik sira-nia oan bá servisu, ne’ebé bainhira buat ruma akontese, parte rua prontu hamutuk buka dalan hodi rezolve. Aban na’in-92 aranka uluk no na’in-tolu, sesta (18/03) hamutuk ho tolu, nune’e na’in-neen mak  aranka, maibé ohin ne’e hotu-hotu asina deklarasaun,” Sekretáriu Estadu Alarico de Rosário, hateten, iha salaun Madre Canosiana, Becora.

Notísia relevante: SEFOPE despede traballadór timor-oan na’in-69 desloka aban bá Austrália

Iha biban hanesan, Diretór Jerál SEFOPE, Paulo Alves, husu traballadór sira ne’ebé sei aranka atu hatudu nafatin komportamentu di’ak.

“Tanba imi ba la’ós  Governu mak obrigada, maibé imi rasik mak hili ba buka osan hodi hadi’a moris. Ha’u husu ba traballadór sira, bainhira serbisu tenke kuidadu-an no rai osan ho di’ak hodi haruka mai família iha Timór, nune’e bele diversifika ekonomia família no buat ne’ebé imi apreende, fila mai bele aplika fali iha ita-nia nasaun,” nia fó hanoin.

Traballadór na’in-98 ne’ebé aban sei aranka bá Austrália, sei ba serbisu liuhosi programa rua hanesan Pacific Laboor Scheme (PLS) no Seasonal Worker Programme (SWP).

“Ita-nia traballadór 92 hirak ne’e, ba serbisu iha programa rua no iha kompañia neen hanesan, Berry Pays na’in-32, Tasmania Berries 30, Hillwood Berries sanulu, Koala Farm sia, Top of The Crop 11,” nia informa

Enkuantu, na’in-neen ne’ebé sei aranka bá Austrália, sesta ne’e hodi ba serbisu liuhosi PLS ho kompañia Kimberly Accommodation.

Nune’e, tinan ne’e hahú hosi janeiru to’o marsu, SEFOPE konsege haruka ona traballadór 300 resin.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here