Grupu responsável konstrusaun hahú sobu Eskola Cabira-Oan iha Viqueque. Imajen/Espesiál

VIQUEQUE, 15 marsu 2022 (TATOLI)—Grupu komunitáriu ne’ebé antes ne’e halo kontratu ho Ministériu Edukasuan Juventude no Desportu (MEJD), sei hahú konstrusaun eskola lima iha Viqueque, semana oin.

“Projetu komunitáriu iha Viqueque hamutuk 13 lansa iha fulan-fevereiru, ne’ebé eskola lima maka seidauk implementa tanba kondisaun estrada. Maibé, semana oin ne’e hahú implementa ona,” Diretór Servisu Edukasaun munisípiu Viqueque, Emidio Amaral, hateten ba Agência TATOLI, iha ninia knaar fatin, Beloi, tersa ne’e.

Notísia relevante: Eskola lima Viqueque seidauk implementa projetu komunitáriu tanba kondisaun estrada

Antes ne’e, orsamentu tama ona iha konta bankária grupu komunitáriu sira, ne’ebé toma-konta ba projetu.

“Projetu ne’e ninia durasaun fulan-neen de’it. Tanba ne’e, grupu responsável sira tenki aselera serbisu hodi to’o loron ne’ebé determina ona bele finaliza,” nia sujere.

Projetu komunitáriu ne’ebé atu implementa iha semana oin iha postu Ossu iha eskola rua mak seidauk implementa projetu hanesan Eskola Ensinu Báziku Filiál (EBF) Uaibobo ho sala tolu, ho orsamentu $116.976,18 no Eskola EBF Liaruca iha sala tolu ho orsamentu $112.599.

Postu Uatulari eskola rua maka seidauk implementa projetu hanesan EBF Uaibira iha sala tolu, ho orsamentu $103.111,97 no EBF Edimumo iha sala tolu ho orsamentu hamutuk $98.958,49.

Postu Viqueque villa Eskola Pre-Eskolár Sebestião Gomes iha sala rua, iha suku Uaimori seidauk implementa projetu ho orsamentu $89.396,09.

“Tuir planu, entre eskola lima ne’e sei implementa dala-ida ho eskola 13 ne’ebé konstrui ona, maibé dalan liga ba fatin konstrusaun ho kondisaun a’at,” nia akresenta.

Progresu konstrusaun eskola liuhosi projetu komunitáriu hamutuk 13, ne’ebé antes ne’e implementa iha fevereiru 2022, ne’ebé hosi eskola hirak ne’e, progresu Eskola EBF Cabira-oan atinje ona 60% .

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here