Implementasaun projetu komunitáriu iha EBF Nahae, postu Uatulari. Imajen TATOLI/Vitorino Lopes da Costa

VIQUEQUE, 25 fevereiru 2022 (TATOLI)—Projetu komunitáriu ba reabilitasaun no konstrusaun infraestutura eskola hahú implementa ona iha munisípiu Ermera, maibé eskola balun ne’ebé tama lista seidauk implementa tanba kondisaun estrada.

“Projetu komunitáriu ba eskola 18 iha munisípiu Viqueque, ita foin implementa iha eskola 13, maibé eskola lima seidauk bele impementa tanba daudaun kondisaun udan halo estrada liga ba eskola lima  ho kondisaun a’at. Kondisaun klima di’ak mak ita implementa ba eskola hotu maibé tempu udan karreta tula materiál konstrusaun ba mós ladi’ak,” Diretór servisu Edukasaun munisípiu Viqueque, Emidio Amaral, informa ba Agência TATOLI, iha ninia knaar fatin, Beloi, sesta ne’e.

Notísia relevante: MEJD lansa projetu komunitáriu konstrusaun sala Eskola ESJ Olocasa Viqueque

Alokasaun orsamentu programa ne’e iha Viqueque hamutuk $1.781.991,95, ne’ebé orsamentu transfere ona ba konta bankária grupu komunitáriu sira hotu ne’ebé toma konta ba projetu.

Iha postu administrativu Viqueque villa, eskola ne’ebé implementa ona programa ne’e mak hanesan Ensinu Sekundári Calixa iha sala tolu  ho orsamentu hamutuk $113.359,56, Ensinu Báziku Filiál (EBF) Ular Rihik iha sala tolu ho orsamentu konstrusaun hamutuk $70.533,26, Eskola Pre-ESC Maria Lobato iha sala rua ho montante orsamentu hamutuk $99.495,02,  Eskola Ensinu Báziku Sentrál (EBC, sigla portugés) Cabira-oan iha sala haat ho orsamentu hamutuk $52.836,14  no eskola Pre-ESC Sebestião Gomes iha sala rua, iha suku Uaimori seidauk implementa projetu konstrusaun ho totál orsamentu hamutuk $89.396,09.

Postu admistrativu Ossu Eskola Pre-Eskolár Uaibua iha sala tolu ho orsamentu $86.739,52, Eskola Ensinu Sekundáriu Jerál (ESJ) Olocasa iha sala tolu ho orsamentu hamutuk $112.885,23.

Postu Ossu iha eskola rua seidauk implementa projetu maka hanesan eskola EBF Uaibobo ho sala tolu ho orsamentu hamutuk $116.976,18 no eskola EBF Liaruca iha sala tolu ho orsamentu hamutuk $112.599.

Postu administrativu Uatulari ne’ebé maka implementa ona projetu maka hanesan eskola EBF Nahae iha sala tolu ho orsamentu hamutuk $114.134,85, EBC Uatulari iha sala tolu ho orsamentu hamutuk $70.191,21, EBF Ualeque iha sala tolu ho orsamentu hamutuk $106.475,42, Eskola Sekundáriu Tékniku Vokasionál  (ESTV) Kaloheda dada  bee ho orsamentu hamutuk $159.590,65, EBF Debuisi iha sala tolu ho orsamentu hamutuk $98.990,27 no eskola rua maka seidauk implementa projetu maka hanesan EBF Uaibira iha sala tolu ho orsamentu hamutuk $103.111,97 no EBF Edimumo iha sala tolu ho orsamentu hamutuk $98.958,49.

Nune’e mós, postu administrativu Uatucarbau iha projetu konstrusaun eskola ne’ebé implementa ona maka hanesan ESJ Uatucarbau iha sala haat ho orsamentu hamutuk $90.595,35 no EBC Uatucarbau sala haat ho orsamentu hamutuk $85.016,63.

“Ha’u fó  hanoin ba grupu komunitáriu sira, bainhira atu halo konstrusaun tenki garante kualidade, nune’e bele hetan nafatin konfiansa hosi Governu hodi responsável ba projetu komunitáriu  sira,” nia hato’o.

Eskola 15 ne’ebé implementa ona projetu komunitária ne’e seidauk atinje pursentu 25% tanba foin implementa projetu.

“Maski daudaun udan, ha’u  husu grupu komunitáriu sira bele aselera prosesu konstrusaun tanba data limitasaun ba projetu komunitáriu ho durasaun fulan-neen. Tanba ne’e, presiza aselera prosesu hodi finaliza tuir tempu ne’ebé determina ona,” nia dehan.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here