Ekipa Brigada STAE Bobonaro halo hela pakotementu ba materiál eleisaun prezidensiál. Imajen Tatoli/Sérgio da Cruz.

BOBONARO, 14 marsu 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, segunda ne’e verifika ona bulletin votu kaixa 20 no sei falta kaxa ualu.

Materiál eleisaun prezidensiál ne’ebé transporta hosi nasionál to’o iha Bobonaro iha loron sesta lokraik mak hanesan materiál senstivu buletin votu 79.200, livru 1.584 iha kaixa 28 karimbu no tinta.

Enkuantu materiál la’ós-sensitivu mak hanesan, kaixote, akta rezultadu eleisaun, formuláriu reklamasaun, pasta plástiku, fita, stop map no materiál sira seluk ne’ebé utiliza ba eleisaun prezidensiál.

“Ita simu buletin votu hamutuk kaixa 28, ita halo ona verifikasaun atu haree keta iha buletin balun iha tinta kona tiha ona ka lae, nomoos balun keta ku’ak ona karik, ne’e mak to’o agora konklui ona kaixa 20, falta de’it ualu mak seidauk, parese orsida kalan ami halo tán verifikasaun hotu ona,” Diretór STAE Munisípiu Bobonaro, Mariano Viegas, ko’alia iha Maliana.

Totál eleitór iha munisípiu Bobonaro hamutuk 70.283 maibé hosi nasionál prevee buletin aumenta 10% ho totál buletin votu 79.200 tanba razaun atu antesipa ba fiskál, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), monitorizadór sira no jornalista sira-ne’ebé sei vota iha kualkér sentru votasaun.

Enkuantu ativdade verifikasaun ne’e hahú kedas iha sesta semana kotuk, ne’ebé hetan obervasaun  husi Komisaun Nasionál Eleisaun (CNE, sigla portugés) obervadór internasionál hosi Uniaun Europeia (UE), fiskál hosi kandidatura na’in-16 no hetan seguransa másima hosi komandu PNTL munisípiu Bobonaro.

Munisípiu Bobonaro iha sentru votasaun 130 no estasaun votu 150. Númeru ne’e kompostu hosi postu administrativu Atabae iha sentru votasaun 13 no estasaun votu 15, Balibo iha sentru votasaun 20 no estasaun votu 24.

Iha postu administrativu Bobonaro iha sentru votasaun 40 ho estasaun votu 44, Cailaco sentru votasaun 15 no estasaun votu 16. Iha parte postu administrativu Lolotoe iha sentru votasaun 15 no estasaun votu 15 no iha postu administrativu Maliana iha sentru votasaun 28 no estasaun votu 36.

Notisia relevante: STAE estabelese sentru votasaun ambulante iha Hospital Referál Maliana

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here