Hosiptal Referál Maliana (HRM), Munisípiu Bobonaro. Imajen Tatoli/Sérgio da Cruz.

BOBONARO, 14 marsu 2022 (TATOLI) – Sekretaridau Tékniku Administrasaun Eleitorál (STAE) Munisípiu Bobonaro, estabelese sentru votasaun ambulante iha Hospital Referál Maliana, nune’e fasilita pasiente hirak-ne’ebé hala’o tratamentu bele ezerse direitu votu iha eleisaun prezidensiál.

Diretór STAE Munisípiu Bobonaro, Mariano Viegas Amaral, informa estabelesimentu sentru votasaun ambulante ne’e atu fasilita pasiente ne’ebé halo hela tratamentu iha ospital ho ninia família inklui mós médiku, enfermeiru no partéira sira-ne’ebé hala’o serbisu.

“Ema-ne’ebé iha direitu atu vota iha sentru votasaun ambulante primeiru tenke iha eleitorál, karik ema-ne’e naran iha lista votante maibé kartaun eleitorál laiha, nia bele uza dukumentu seluk hanesan Billete Identidade (BI) Timor válidu no pasaporte Timor válidu. Sé hirak-ne’e mak laiha hotu entaun labele,” nia ko’alia iha Maliana, segunda ne’e.

Nia haktuir, daudaun ne’e parte Hospital Referál Maliana submete ona lista eleitór na’in 70-resun ba STAE atu vota ba sentru votasaun ambulante ne’e.

Sentru votasaun ne’e mós sei hetan supervizaun husi Komisaun Nasionál Eleisaun (CNE, sigla portugés), observador inernasionál no fiskál hosi kandidatu Prezidente Repúblika na’in-16 nian, no sei hetan seguransa másima hosi komandu PNTL.

“Ami sei nafatin koordena ho parte Hospital Referál Maliana, nune’e bainhira iha loron eleisaun mak ema moras, ita sei fasilita nafatin sira ba vota, enkuantu sira-ne’ebé agora baixa hela loron eleisaun bele vota maibé ba sira-ne’ebé alta ona tenke ba ezerse fali sira-nia direitu iha sentru votasaun no estasaun votu iha idak-idak nia suku,” nia esplika.

Diretór STAE Munisípiu Bobonaro ne’e aplela ba sidadaun hotu-hotu iha munisípiu refere katak, hahú ohin ba oin bainhira atu ba halo tratamentu iha postu no sentru saúde sira-ne’ebé estabelese iha postu administrativu sira inklui Hospital Referál Maliana tenke lori dukumentu sira hanesan kartaun eleitorál, billete identidade no pasaporte válidu nune’e bele ezerse direitu votu iha loron eleisaun.

Munisípiu Bobonaro iha sentru votasaun 130 no estasaun votu 150. Númeru ne’e kompostu hosi postu administrativu Atabae iha sentru votasaun 13 no estasaun votu 15, Balibo iha sentru votasaun 20 no estasaun votu 24.

Iha postu administrativu Bobonaro iha sentru votasaun 40 ho estasaun votu 44, Cailaco sentru votasaun 15 no estasaun votu 16. Iha parte postu administrativu Lolotoe iha sentru votasaun 15 no estasaun votu 15 no iha postu administrativu Maliana iha sentru votasaun 28 no estasaun votu 36.

Jornalista   : Sérgio da Cruz

Editór         : Evaristo Soares Martins 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here