Diretór Ezekutivu TIC Timor I.P, Roberto Caetano de Sousa Vicente. Imajen TATOLI/Francisco Sony

DILI, 11 marsu 2022 (TATOLI)–Agência Tecnologia da Informação e Comunicação Timor, Institutu Públiku (TIC Timor, I.P) asina nota entendimentu ho Ajénsia Nasionál Avaliasaun Akreditasaun Akadémiku (ANAAA), sesta ne’e, atu apoiu hadi’a jestaun sistema informátika internál instituisaun.

Diretór Ezekutivu TIC Timor, I.P, Roberto Caetano de Sousa Vicente, hateten, institutu ninia papél mak atu fó tulun ba instituisaun Estadu sira, tantu públiku no privadu iha área espesífiku informátika.

“Asinatura memorandu entendimentu ho ANAAA nu’udar faze dahuluk ba serbisu entre parte rua iha futuru. Ita sei apoiu ANAAA ba komponente prinsipál rua hanesan fornesimentu portál no asegura dadus ajénsia. Durante ne’e sira seidauk iha portál ida ne’e maka ita sei apoiu, nune’e ba oin ita sei abranje tan área seluk ne’ebé presiza,” Diretór Ezekutivu ne’e informa iha salaun Ian Martin Instituto Nacional de Formação de Docentes e Profissionais da Educação de Timor-Leste (INFORDEPE), Balide.

Notísia relevante: OJE 2022: PN aprova orsamentu adisionál millaun $1.6 ba TIC Timor

Inisiativa ne’e nu’udar pasu atu TIC Timor, I.P bele fornese servisu ba ANAAA, ne’ebé nesesidade ne’e hodi fahe informasaun ba públiku liuhosi portál inklui tulun ajénsia ne’e hadi’a liután jestaun sistema informátika internál.

Servisu ne’ebé TIC Timor, I.P fornese mak hanesan email, konetividade, no organiza sistema dadus internál atubele fahe dadus ba malu hodi bele asesu bainhira de’it no iha ne’ebé de’it durante oras 24 nia laran, inklui konstribui ambiente saudável tanba bele halo redusaun ba produsaun surat tahan.

Enkuantu, servisu TIC Timor, I.P durante ne’e kobre asuntu hanesan sentralizasaun sistema informátika, dezenvolve aplikasaun ligadu ba eletróniku, servisu eletróniku sira ne’ebé haree ba padraun polítika kona-ba sistema informátika.

Ho nune’e, TIC Timor, I.P iha ona kooperasaun ho instituisaun hamutuk 49, hahú instituisaun ne’e estabelese iha tinan 2017 to’o ohin loron.

“Ne’e hatudu katak kontribuisaun ba poupansa ne’e boot tebes, kuaze millaun $45 hosi orsamentu Estadu nian, iha investimentu ba área informátika tanba utiliza ona sistema informátika ne’ebé TIC Timor, I.P uza inklui infraestrutura ne’ebé to’o iha munisípiu 12,” Diretór Ezekutivu dehan.

Jornalista : Tomé Amado

Editora     : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here