Situasaun debate no votasaun OJE 2022 iha faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 14 dezembru 2021 (TATOLI)—Deputadu sira iha Parlamentu Nasionál liuhosi diskusaun espesialidade proposta lei Orsamentu Jerál Estadu (OJE) 2022 aprova orsamentu adisionál millaun $1.6 ba Ajénsia Tekonolójia Informasaun no Komunikasaun (TIC, siglá portugés) Timor Institutu Públiku.

Proposta adisionál ne’e aprezenta hosi proponente Fabio de Oliveira (Fretilin), Maria Angélica Rangel (Fretilin) ho Maria Angelica Sarmeto (PLP), ho votu afavór-24, kontra ida no abstensaun 17.

“Nune’e proposta númeru 129 pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária, tersa ne’e.

Proposta númeru 129 ho títulu (Servisu/Órgaun) Ajénsia Tekonolójia Informasaun no Komunikasaun iha kategória despeza bens no servisu ho programa kódiku 252 kona-ba telekomunikasaun, dotasaun inisiál $953.969 ho alterasaun aumenta $1.619.945 nune’e dotasaun finál sa’e ba $2.573.914.

Ho justifikasaun kontinuasaun fornesimentu liña internet ba Governu tomak, ho ida-ne’e orsamentu adisionál kobre ba atividade rua mak sei selu dívida iha tinan 2022 no kontinuasaun fornesimentu servisu internet.

Nune’e mós, PN aprova OJE 2022 ho montante inisiál $4,733,971 ba TIC Timor ho votu a-favór-45, kontra 0 no abstensaun 15.

Orsamentu tinan 2022 ne’e, aloka ba bens servisu $3,669,791, kapitál menór $1,064,180, saláriu vensimentu, kapitál dezenvolvimentu no transferénsia públika laiha.

Orsamentu TIC Timor refere sei finansia programa rua, sub-programa haat no atividade neen.

Programa telekomunikasaun prevee $953,969 no programa boa-governasaun no jestaun instituisionál prevee $3,780,002.

Jornalista : Nelson de Sousa

Editór       : Cancio Ximenes

 PN aprova orsamentu adisionál millaun $2 ba IPG

PUBLISIDADEiklan

HAKEREK NO HATÁN

Please enter your comment!
Please enter your name here