Prezidente Tribunál Rekursu, Deolindo dos Santos. Imajen Tatoli /Francisco Sony

DILI, 11 marsu 2022 (TATOLI)— Prezidente Repúblika, Francisco Guterres Lú-Olo, deklara ona nia rikusoin ka rendimentu, bens no interese ba Tribunál Rekursu, hodi kumpre lei númeru 7/2020, 26 agostu kona-ba Medida Prevensaun no Kombate Korrupsaun (MPCC, sigla portugés).

“Xefe Estadu deklara ona rikusoin ka rendimentu, bens no interese mai iha Tribunál Rekursu liuhosi prenxe formuláriu iha sistema plataforma online,” Prezidente Tribunál Rekursu Deolindo dos Santos, hateten ba Jornalista sira iha edifísiu Ministériu Justisa-Caicoli, sesta ne’e.

Notísia relevante:  Tribunál Rekursu lansa formuláriu online ba deklarasaun riku-soin

Tribunál Rekursu ofiasialmete lansa formuláriu liuhosi sistema plataforma online ba deklarasaun rendimentu bens no interese tuir lei 7/2020, 26 agostu MPC iha kapitulu II kona-ba Rejime Deklarasaun Rendimentu, Bens no Interese hosi artigu 27 to’o 58.

Nune’e iha loron 16 fevereiru, TR autoriza ba autoridade sira ne’ebé iha kompeténsia ba Supremu Tribunál ba Justisa no orgaun titulár soberanu hanesan membru Governu no Deputadu sira atu prenxe formuláriu to’o iha 16 marsu.

“Ha’u halo verifikasaun hamutuk ho tékniku sira ne’ebé halo jestaun ba formuláriu ne’e, haree Prezidente Repúblika, Deputadu balun no membru Governu balun, dirijente Komisaun Anti Korrupsaun (CAC,sigla Portugés) kuaje 20-resin mak prenxe ona formuláriu ne’e,” nia akresenta.

Nune’e, Prezidente TR ne’e husu ba órgaun titular sira atu prenxe formuláriu deklasaun rendimentu no bens ineterese tanba la prenxe sei kona konsekúensia legál tuir lei MPCC.

“Prenxe formuláriu sei to’o de’it iha loron 16 marsu, ne’ebé agora ita tama ona 11 marsu ne’ebé hela loron lima dei’t atu sira ne’ebé seidauk prenxe formuláriu tenke prenxe ona tanba lei mak obriga,”Prezidente PR ne’e sujere.

Prezidente Deolindo afirma kona-ba nia riku-soin sira hosi Prezidente Repúblika no membru Governu, Deputadu no lideransa juridisaun ne’ebé deklara ona liuhosi prenxe formatu plataforma online seidauk bele públika ba publiku.

Notísia relevante: 2022, titulár órgaun soberanu no kargu xefia iha obrigasaun deklara riku-soin

Formuláriu liuhosi plataforma online ne’ebé TR estabelese hodi fasilita orgaun tilulár sira hanesan Prezidente Republika, Prezidente Parlamentu Nasionál ho nia-Vise Prezidente sira, Deputadu sira, Primeiru Ministru ho nia membru Governu sira no Komisáriu Komisaun Anti Korrupsaun.

Sistema plataforma online ka formuláriu online deklarasaun rendimentu, bens no interese ne’e instala hosi Agência Teknolojia Informasaun no Komunikasaun Insititutu Públiku (TIC-Timor, I.P).

Tanba, bazeia ba artigu 6 iha Lei 7/2007, 25 jullu kona-ba estatutu titulár soberania, katak lidensa órgaun soberanu sira tenke deklara nia riku-soin no família nian ba Tribunál Rekursu.

Enkuantu, tuir Lei númeru 7/2020, 26 agostu kona-ba Medida Prevensaun no Kombate Korrupsaun (MPCC, sigla portugés) iha kapitulu II Rejime Deklarasaun Rendimentu, Bens no Interese hosi artigu 27 to’o 58.

Nune’e, Lei MPKK define ona iha artigu 48 to’o artigu 53, katak ema ne’ebé simu ona pose tuir lei atu asume kargu xefia iha obrigasaun deklara riku-soin dentru 30 nia-laran, liu ida ne’e hetan sansaun ho koema 25% to’o 30%.

Nune’e mós Komisaun Anti Korrupsaun (CAC), mós hahú serbisu hamutuk ho TIC-Timor prepara ona formatu ba deklasaun riku-soin ne’ebé kuaje atinje 99%.

Daudaun ne’e, CAC liuhosi Diresaun Prevensaun no Sensibilizasaun, simu ona lista funsionáriu ho kargu Xefia hosi insitituisaun Estadu hamutuk 100 ho deklarante ema na’in-5.774 mak sujeita atu deklara riku-soin no bens interese iha 2022.

Notísia Relevante: Instituisaun Estadu 100 deklara riku-soin ba CAC iha 2022

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here