Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 09 dezembru (TATOLI)— Prezidente Tribunál Rekursu (TR), Deolindo dos Santos, husu ba titulár órgaun soberanu no funsionáriu kargu xefia iha obrigasaun atu deklara nian riku-soin ba Supremu Tribunál Justisa no Komisaun Anti Korrupsaun iha janeiru 2022.

“Deklarasaun riku-soin ne’e tuir lei Prevensaun Medida Kombate Korrupsaun (MPCC,sigla Portugés), iha buat rua mak titulár órgaun soberanu, hanesan Prezidente Repúblika, Prezidente Parlamentu Nasionál, Primeiru Ministru, Ministru-sira no Deputadu sira ne’e deklara ba Supremu  Tribunál Justisa no  ba nivél kargu Xefia sira aprezenta ba  Komisaun Anti Korrupsaun (CAC sigla portugés),” Prezidente TR ne’e hateten ba Agência TATOLI iha Salaun CNE Laline Larigutu, Colmera, kinta ne’e.

Notísia Relevante: Espoza PM Taur deklara riku-soin ba Tribunál Rekursu

Tanba, Bazeia ba artigu 6 iha Lei 7/2007, 25 jullu kona-ba estatutu titulár soberania, katak lidensa órgaun soberanu sira tenke deklara nia riku-soin no família nian ba Tribunál Rekursu.

Enkuantu, tuir Lei númeru 7/2020, 26 agostu kona-ba Medida Prevensaun no Kombate Korrupsaun (MPCC, sigla portugés) iha kapitulu II Rejime Deklarasaun Rendimentu, Bens no Interese hosi artigu 27 to’o 58.

Nune’e, Lei MPKK define ona iha artigu 48 to’o artigu 53, katak ema ne’ebé simu ona pose tuir lei atu asume kargu xefia iha obrigasaun deklara riku-soin dentru 30 nia-laran, liu ida ne’e hetan sansaun ho koema 25% to’o 30%.

“Lei MPCC entra vigór iha fevereiru 2021, entaun ita labele presta deklasaun ona, ne’ebé tenke iha obrigasaun presta deklasaun hahú janeiru tinan oin (2022),” nia sujere.

Nune’e, Tribunál Rekursu koordena ho Agência Teknolojia Informasaun no Komunikasaun Insititutu Públiku (TIC-Timor, I.P) hodi aseleira estabelese Sistema Plataforma online ba deklarasaun redimentu bens no interese.

“Ami ho TIC agora halo ona prepasaun hodi kria formatu deklasaun riku-soin, ne’ebé besik finaliza ona atu janeiru 2022 obrigatoriu tenke deklara riku-soin,” nia akresenta.

Iha fatin hanesan, Komisáriu CAC, Sergio Hornai, informa, hahú halo diskusaun ho Supremu Tribunál Justisa liuhosi serbisu hamutuk ho TIC-Timor prepara ona formatu ba deklasaun riku-soin.

“Ita halo hela preparasaun ba formuláriu ne’ebé atinje 99% ne’ebé ita sei halo hela esforsu atubele kompleta,” nia garante.

Daudaun ne’e, CAC liuhosi Diresaun Prevensaun no Sensibilizasaun, simu ona lista funsionáriu ho kargu Xefia hosi insitituisaun estadu hamutuk 100 ho deklarante ema na’in-5.774 mak sujeita  atu deklara riku-soin no bens interese iha 2022.

Notísia Relevante: Instituisaun Estadu 100 deklara riku-soin ba CAC iha 2022

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here