Ámbitu kampaña Kandidatu PR períodu 2022-2027, Francisco Guterres ‘Lú Olo’, iha kampu futeból, Viqueque villa, sesta (11/03). Imajen TATOLI/Vitorino Lopes da Costa

VIQUEQUE, 11 marsu 2022 (TATOLI)—Vise-Prezidente Os Verdes, Sailafila Junior, husu ba militante no simpatizante iha munisípiu Viqueque atu fó apoiu ba Kandidatu Prezidente Repúblika (PR) períodu 2022-2027, ho númeru sorteiu 06, Francisco Guterres ‘Lú Olo’.

“Ha’u husu ba simpatizante sira hosi partidu Os Verdes iha Viqueque atu vota ba Kandidatu Prezidente Repúblika, Francisco Guterres ‘Lú Olo’, atu haree ba povu,” Sailafila Junior, hateten, durante kampaña Kandidatu PR Lú Olo, iha kampu futeból, Viqueque villa, sesta ne’e.

Notísia relevante: Os Verdes deklara apoiu kandidatu PR Lú Olo

Tuir reprezentante organizasaun masa ne’e, Os Verdes aposta ninia-an fó apoiu ba Kandidatu PR Lú Olo hosi nasionál to’o baze, ba dezenvolvimentu povu tomak, hadi’a no hasai povu hosi kiak no mukit.

“Ami-nia militante Os Verdes hosi nasionál to’o baze hamutuk 50.000, ne’ebé sei fó votu ba Kandidatu Francisco Guterres atu sai Prezidente Repúblika ba povu tomak,” nia dehan.

Iha fatin hanesan, Komisáriu Nasionál Partidu Unidade Dezenvolvimentu Demokrata (PUDD), Agapito do Rosário, husu ba militante no simpatizante iha Viqueque atu vota ba Lú Olo.

“Ha’u husu ba estrutura no membru PUDD sira iha munisípiu ne’e tenki vota ba kandidatu ho númeru sorteiu 06, hodi ita bele marka istória ba períodu rua,” nia tenik.

Notísia relevante: Reeleitu sai PR, Lú Olo hakarak harii ekonomia sustentável ba povu

Iha biban ne’e, Vise-Prezidente Komisaun Polítika Nasionál (CPN, sigla portugés) Partidu Libertasaun Populár (PLP), António Freitas, husu ba militante iha Viqueque atu fó apoiu ba Lú Olo.

“Razaun fó apoiu ba kandidatu ne’e tanba nia maka fó garantia tomak ba Prezidente PLP, Taur Matan Ruak, hodi lidera VIII Governu. Ho razaun ida-ne’e maka ami fó apoiu ba kandidatu Lú Olo,” nia hato’o.

Iha okaziaun ne’e, organizasaun rezisténsia kladestina, Koli-Mau 200 husu membru sira iha Viqueque atu fó apoiu ba Lú Olo.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here