Partidu Os Verdes de Timor-Leste, ofisalmente deklara apoiu Francisco Guterres ‘Lú Olo’ sai Prezidente Repúblika, iha Tasi-tolu, sábadu (12/02). Imajen TATOLI/Francisco Sony

DILI, 12 fevereiru 2022 (TATOLI)Partidu Os Verdes de Timor-Leste ofisialmente deklara fó apoiu ba kandidatu Prezidente Repúblika (PR), Francisco Guterres ‘Lú Olo’ ba períodu 2022-2027, iha Eleisaun Prezidensiál tinan ne’e.

“Ha’u husu lisensa ba rai lulik ne’e, partidu Os Verdes sei fó apoiu totál ba kandidatura Kamarada Lú Olo,” Prezidente Partidu Os Verdes de Timor-Leste, António Lela Huno, deklara iha Tasi-tolu, sábadu ne’e.

Notísia relevante: Kandidatu PR Lú-Olo rejista ona iha Tribunál Rekursu

Prezidente Partidu Os Verdes de Timor-Leste, António Lela Huno. Imajen TATOLI/Francisco Sony

Tuir nia, Timor-Leste presiza Xefe Estadu ne’ebé forte iha nia lideransa no labele kaer fali ema seluk nia pasta, nune’e bele foku ba serbisu tau-matan ba nasaun.

“Tanba ne’e, Os Verdes nu’udar partidu ida ne’ebé hakarak afirma nia posizaun apoiu rekandidatura Prezidente Repúblika ‘Lú Olo,” António Lela Huno akresenta.

Nia garante, hamutuk ho ekipa sei lori kandidatu PR Lú Olo manán iha primeira ronde.

“Ita-nia ema hamutuk 70.000 no iha 10.000 maka halo knaar nu’udar estrutura iha adeia suku, postu to’o munisípiu. Tanba ne’e, husu ba ita ita-boot sira hotu iha ne’e, atu iha loron eleisaun vota ba Lú Olo hodi nia manan iha primeira ronde,” nia tenik.

Biban ne’e, Prezidente Partidu Os Verdes rejeita informasaun katak partidu foun ne’e fó apoiu ba kandidatu seluk.

“Ami atu dehan katak iha ema balun influénsia ita-nia aman balun hosi Os Verdes hodi halo konferénsia imprensa katak Os Verdes fó apoiu ba kandidatu balun, ne’e la loos, tamba ami sira ne’ebé iha ne’e nu’udar insiadór partidu só fó apoiu ba kandidatura Lú Olo hodi sai Prezidente Repúblika dala-ida tan,” Prezidente Partidu afirma.

Sekertáriu Jerál Partidu FRETILIN, Marí Alkatiri. Imajen TATOLI/Francisco Sony

Iha fatin hanesan, Sekretáriu Jerál partidu Frente Revolusionáriu Timor-Leste Independente (FRETILIN), Marí Alkatiri, agradese ba apoiu.

“Bainhira dirijente Os Verdes foin daudaun ba hasoru ha’u, sira ko’alia ho ha’u katak ami apresia ho ita-boot nia serbisu durante ne’e iha Oé-cusse. Tanba ne’e, ami harak deside ita la’o hamutuk hodi fó apoiu ba kandidatu Prezidente Repúblika,” Alkatiri haktuir.

Seremónia anunsiu ofisiál apoiu kandidatu PR ne’e hetan partisipasaun hosi ekipa susesu Francisco Guterres ‘Lú Olo’ no estrutura partidu FRETILIN balun, inklui militante no simpatizante partidu Os Verdes rasik.

Jornalista : Natalino Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here