AIFAESA halo apreensaun ba tabaku ho marka Surya no Joker, iha merkadu Taibesi, sesta (11/03). Imajen TATOLI/Francisco Sony

DILI, 11 marsu 2022 (TATOLI)—Autoridade Inspesaun no Fiskalizasaun ba Atividade Ekonómika Sanitária no Alimentár (AIFAESA), sesta ne’e, halo atividade inspesaun ba tabaku ilísitu sira iha merkadu Taibesi.

Sub-Inspetór Jerál AIFAESA, Deonísio Neto da Silva. Imajen TATOLI/Francisco Sony

Sub-Inspetór Jerál AIFAESA, Deonísio Neto da Silva, hateten, objetivu atividade ne’e tanba iha tabaku balun mak Governu la autoriza atu komersializa iha merkadu, bazeia ba dekretu-lei númeru 14/2016 kona-ba rejime kontrolu tabaku, ne’ebé bandu negosiante sira fa’an tabaku elísitu.

“Hosi intervensaun ekipa, deteta negosiante na’in-lima fa’an sigaru elísitiu, nune’e ita halo apreensaun ba tabaku Joker plástiku 480, Surya slop 11 no masu 263,” Reprezentante AIFAESa informa iha merkadu Taibesi.

Notísia relevante: AIFAESA prende tabaku ilísitu 117 no joker kaixa tolu

AIFAESA halo apreensaun ba tabakuho marka Surya no Joker, iha merkadu Taibesi, sesta (11/03). Imajen TATOLI/Francisco Sony

Nia dehan, bainhira negosiante sira kontra dekretu-lei 14/2016, hodi kontinua fa’an tabaku elísitiu maka autoridade kompetente sei prosesa tuir lei no sei hetan sansaun multa osan ho montante hahú hosi $70 to’o $1.000.

Iha biban hanesan, Negosiante tabaku, Fernando Tilman, sente triste tanba AIFAESA foti sasán ne’ebé durante ne’e nia fa’an hodi sustenta família nia moris.

Negosiante tabaku iha merkadu Taibesi, Fernando Tilman. Imajen TATOLI/Francisco Sony

“Ami sosa tutan sasán mak fa’an, tanba ne’e sente triste bainhira AIFAESA mai foti hotu ami-nia tabaku ne’ebé ami faan, maibé nu’udar sidadadun tenke kumpre ba lei ne’ebé iha. Ha’u sujere ba Governu, bainhira halo ona apreensaun ba ami-nia sasán, tenke mós kontrolu ba sasán tama ilegál sira, hanesan kontinua hatama tabaku mai, nune’e ami mós labele fa’an,” nia dehan.

Atividade inspesaun ne’e ho kooperasaun ho Polísia Nasionál Timor-Leste (PNTL) hosi unidade Servisu Investigasaun Kriminál Nasionál no Polísia Eskuadra Nain-Feto.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here