AIFAESA no PNSIK halo apreensaun ba sigaru ho marka Surya no Joker, iha merkadu Taibesi, tersa (07/09). Imajen TATOLI/Francisco Sony

DILI, 07 setembru 2021 (TATOLI)–Ekipa Autoridade Inspesaun, Fiskalizasaun Atividade Ekonómia, Sanitária no Alimentár (AIFAESA), akompaña hosi Polísia Nasionál Servisu Investigasaun Kriminál (PNSIK), halo inspesaun ba negosiante merkadu Taibesi, nune’e hosi atividade konsege prende tabaku ilísitu 117 no joker kaixa tolu.

Inspetór Jerál AIFAESA, Ernesto Monteiro. Imajen TATOLI/Francisco Sony

Inspetór Jerál AIFEASA, Ernesto Monteiro, hateten, razaun halo inspesaun tanba rona informasaun katak iha importasaun ilegál hosi nasaun viziñu Indonézia.

“Tanba ne’e, ekipa sei buka tuir nafatin kios no karrosa roda tolu sira ne’ebé halo negósiu iha dalan públiku iha kapitál Dili. Tabaku ilegál sira mosu tanba konsumidór sira hakarak atu konsumu, maibé iha lei bandu tabaku sira ne’e, nune’e apela ba konsumidór sira atu hapara konsumu tabaku hirak ne’e,” Inspetór Jerál AIFAESA informa iha merkadu Taibesi, tersa ne’e.

Inspesaun konjunta ne’e halo bazeia ba Dekretu-Lei númeru 14/2016, 08 juñu, kona-ba Rejime Kontrolu Tabaku.

Diretór Operasaun AIFAESA, Gabriel da Costa, no ekipa halo apreensaun tabaku ilísitu, iha kios iha merkadu Taibesi, tersa (07/09). Imajen TATOLI/Francisco Sony

Aleinde ne’e negosiante ne’ebé hetan apreensaun sasán, sei selu tan multa ne’ebé sei tama ba kofre Estadu.

“Tuir lei negosiante sira ne’e sei selu multa ba kofre Estadu kiik liu $75, maibé parte jurídiku mak sei toma konta ba prosesu hirak ne’e,” nia akresenta.

Nune’e, AIFAESA sei kontinua halo inspesaun ba iha loja distributór sigaru hodi bele halo kontrolu ne’ebé di’ak.

Autoridade ne’e mós nafatin halo koordenasaun ho parte Alfándega hodi kontrola tabaku ilísitu ne’ebé tama ilegál mai Timor Leste.

Negosiante tabaku, Luís Casamiro Lopes. Imajen TATOLI/Francisco Sony

Iha fatin hanesan, Negosiante tabaku, Luís Casimiro Lopes, hateten, konsumidór sira presiza, tanba ne’e bainhira iha sira sosa.

“Ami ladún hatene kona-ba sigarru sira ne’e bandu iha lei, entaun ema lori mai ami sosa de’it, tanba ema mós buka sigarru Surya 12 no Joker, entaun ami fa’an de’it ona hodi sustenta nesesidade loron-loron. Sigarru Surya 12 ami sosa slop ida $14 no fa’an fali masu ida $2,” nia konta tuir.

AIFAESA no PNSIK halo apreensaun ba sigaru ho marka Surya no Joker, iha merkadu Taibesi, tersa (07/09). Imajen TATOLI/Francisco Sony

Nune’e mós, Tuir Negosiante Teresinha Mendonça de Araújo, sigarru sira ne’ebé sira fa’an la mai husi loja ka supermerkadu ruma ne’ebé estabelese iha Timor Leste, maibé sosa hosi ema sira ne’ebé lori la’o.

“Sente lakon maibé la buat ida, ema lori mai barratu entaun ami mós sosa de’it ona no sigarru sira ne’e ema fa’an la’o de’it la’ós hosi loja ruma,” nia dehan.

Bazeia ba Dekretu-Lei númeru 14/2016, 08 juñu, kona-ba Rejime Kontrolu Tabaku, hatuur katak segaru ne’ebé atu fa’an tenke iha adverténsia sanitária, ne’ebé fó sai avizu kona-ba prejuízu ba saúde bainhira uza tabaku, ne’ebé tenke fó sai iha embalajen tabaku rasik.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here