Prezidente Interinu PLP, Abrão Freitas 'Mate Restu' ko'alia ba mídia hafoin hala'o enkontru ho Prezidente Repúblika, Francisco Guterres Lú Olo. Imajen Tatoli/ Egas Cristóvão.

DILI, 09 marsu 2022 (TATOLI)— Prezidente Interinu Partidu Libertasaun Populár (PLP), Abrão Freitas ‘Mate Restu’, hateten simu ona informasaun hosi Primeiru Ministru, Taur Matan Ruak, katak membru Governu na’in-haat hosi PLP mak tama lista remodelasaun, nune’e hahú prepara ona lista hodi troka.

“Prezidente Partidu PLP atuál Primeiru Ministru,Taur Matan Ruak bolu ha’u hodi informa katak, fulan ne’e,  nia (PM Taur) halo remodelasaun ba membru PLP nian ne’ebé iha Governu. Iha ami nia konversa ne’e mós nia (PM Taur) informa iha membru Governu hosi PLP nian na’in-haat mak tama iha lista remodelasaun,” Prezidente Interinu PLP ne’e hateten ba Agência TATOLI, via telefónika, kuarta ne’e.

Notísia relevante:  PM Taur deklara sei halo remodelasaun

Maske nune’e, Prezidente Internu ne’e  informa seidauk simu lista membru Governu hosi Partidu PLP ne’ebé hetan remodelasaun tanba kompeténsia Xefe Governu nian.

Primeiru Ministru sei halo avalisaun dezempeñu ba membru Governu hirak ne’ebé naran tama iha lista remodelasaun, molok foti desizaun.

“Prezidente Partidu PLP no atuál Primeiru Ministru mós dehan klaramente nia sei halo avaliasaun dezempeñu servisu ba membru Governu hosi PLP nian. Nia (Primeiru Ministru) halo tiha ida ne’e mak sei ko’alia ho partidu kona-ba Ministru ka Sekretáriu Estadu ne’ebé atu remodela. Nune’e ami bele prepara rekursu hodi troka fali membru Governu PLP ne’ebe hetan remodelasaun,” nia akresenta.

Tanba, Membru Governu hosi PLP ne’ebé hetan remodelasaun ne’e sei hetan subtituisaun nafatin hosi kuadru partidu nian. 

“Remodelasaun ne’e lalais liu iha fulan marsu ne’e nia laran. Tanba Xefe Governu hein Prezidente Repúblika Francisco Guterres “Lú-Olo” finaliza atividade kampaña no tama fali servisu mak Primeiru Ministru ba hasoru hodi ko’alia kona-ba asuntu ne’e,” nia afirma.

Nune’e, Partidu PLP hahú prepara lista definitivu ida hodi submete ba Xefe Governu atubele troka membru Governu ne’ebé hetan remodelasaun.

“Semana ida ka rua tan, ami halo lista fixu ona, kuandu Prezidente Partidu PLP atuál Primeiru Ministru halo hotu ona valisaun no informa mai fali partidu, ami submete lista ne’e ba nia hodi haree. Tanba PLP preparadu iha rekursu iha área oin -oin atu troka membru Govenu, ne’ebe hetan remodelasaun,” Prezidente Interinu PLP ne’e afirma.

Iha biban ketak, Ministru Obra Públiku, Salvadór Eugenio dos Reis Pires, ne’ebé mai hosi PLP deklara nia parte prontu simu desizaun hosi Primeiru Ministru tanba kargu ne’e nuudar konfiasa polítika.

“Ha’u laiha komentáriu tanba ne’e Primeiru-Ministru nia kompeténsia,” Ministru Salvador afirma.

Membru Governu hosi Partidu PLP, kompostu hosi Primeiru Ministru no Ministru Interiór, Taur Matan Ruak, Ministru Prezidénsia Konsellu Ministru, Fidelis Manuel Leite Magalhāes, Ministru Obra Públiku, Salvadór Eugenio dos Reis Pires, Ministru Justisa, Manuel Cárceres da Costa, Ministru Ensinu Superiór, Siénsia no Kultura, Longuinhos dos Santos, Ministru Defeza, Filomeno da Paixão de Jesus.

Nune’e mós,Vise-Ministru Saúde Bonifacio MauColi dos Reis, Vise-Ministra Solidariedade Sosiál no Inkluzaun, Signi Chandrawati Verdiál, Sekretária Estadu Igualdade Jéneru no Inkluzaun (SEII), Maria José Fonseca, Sekretáriu Estadu Ambiente, Demétrio do Amaral de Carvalho, Sekretáriu Estadu Komunikasaun Sosiál, Mericio Juvinál dos Reis Akara.

VIII Governu Konstitusionál forma liuhosi plataforma Partidu Libertasaun Populár (PLP), Frente Revolucionária de Timor-Leste Independente (FRETILIN) no Kmanek Haburas Unidade Nasional Timor Oan (KHUNTO).

Notísia relevante: Kuarta, Prezidente Repúblika Sei Fó Pose ba Membru Governu Na’in-21

Jornalista : Natalino Costa/Antonia Gusmão

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here