Membru VIII Governu hamutuk 43 hasai foto hamutuk ho Prezidente Repúblika, Francisco Guterres ‘Lú Olo’, hafoin membru na’in-21 simu pose, iha Palásiu Prezidensiál, Bairro Pité, kuarta (24/06). Imajen TATOLI/António Gonçalves

DILI, 08 marsu 2022 (TATOLI)–Primeiru-Ministru (PM), Taur Matan Ruak, iha tersa ne’e, deklara tempu badak sei halo remodelasaun ba membru VIII Governu Konstitusionál.

Maski nune’e, Xefe Governu seidauk pronúnsia razaun fundamentál ba remodelasaun, maibé konsidera katak prátika remodelasaun normál tanba la’ós foin akontese ba VIII Governu.

“Sei iha remodelasaun, maibé ha’u hanoin iha tiha ba mak ita haree, ami sei hateten sai ba ita-boot (jornalista) sira tanba la’ós atu subar fali, kuandu iha ne’e ami sei hateten katak remodelasaun ne’e sé mak sai sé mak tama, iha área ida ne’ebé, iha ministériu ida ne’ebé,” Xefe Governu, hateten ba jornalista sira, hafoin partisipa workshop kona-ba prosedimentu planeamentu, monitorizasaun no avaliasaun, iha Ministériu Finansa, Aitarak-laran, tersa ne’e.

Notísia relevante: Kuarta, Prezidente Repúblika Sei Fó Pose ba Membru Governu Na’in-21

Xefe Ezekutivu dehan, seidauk iha lista membru Governu sira ne’ebé atu tama iha remodelasaun.

“Lista ha’u la simu tanba desizaun ne’e ha’u mak sei halo, tanba ne’e maka kuandu to’o tempu públiku sei hatene. Ne’e ábitu normál, remodelasaun Governu ne’e sempre halo, tempu ba tempu halo, tanba desde I to’o VIII Governu ne’e prátika normál. Maski hela fulan-ida de’it mandatu ramata mós dala ruma bele halo remodelasaun, ne’ebé lalika preokupa,” PM tenik.

Iha loron 28 maiu 2020, Prezidente Repúblika, Francisco Guterres ‘Lú Olo’, fó pose ba membru VIII  Governu Konstitusionál hamutuk na’in-ualu no tuir fali, iha loron 24 juñu 2020, fó pose tan ba membru Governu na’in-23.

Prezidente Repúblika liuhosi Dekretu Prezidente, númeru 39/2020, nomea Vise Primeiru-Ministru no Ministra Seguransa Sosiál no Inkluzaun Armanda Berta dos Santos, Ministru Prezidénsia Konsellu Ministru Fidelis Manuel Leite Magalhāes, Ministru Asuntu Parlamentár no Komunikasaun Sosiál Francisco Martins da Costa Perreira Jerónimo, Ministru Finansa Fernando Hanjam, Ministru Administrasaun Estatál Miguel Pereira de Carvalho, Ministra Saúde Odete Maria Freitas Belo, Ministru Asuntu Kombatente Libertasaun Nasionál Júlio Sarmento da Costa ‘Meta Malik’, Ministru Agrikultura no Peskas Pedro dos Reis.

Iha 25 maiu, Prezidente Repúblika promulga Lei Orgániku foun VIII Governu Konstitusionál. Iha Lei Orgániku foun, Primeiru Ministru sei koadjuva hosi Vise Primeiru-Ministru na’in-rua. Kada Vise  Primeiru-Ministru ida sei akumula funsaun Ministru Planu no Ordenamentu no Ministra Solidariedade Sosial no Inkluzasaun.

Entretantu, Prezidente Repúblika fó pose ba membru Governu Konstitusionál na’in-21, liuhosi Dekretu Prezidente Repúblika,  númeru 53/2020, ne’ebé uza kompeténsia Konstitusionál tuir artigu 106 númeru 2, hafoin nomea Vise Primeiru-Ministru no Ministru Planu no Ordenamentu José Maria dos Reis, Ministru Koordenadór Asuntu Ekonómiku Joaquim Amaral, Ministru Negósiu Estranjeiru no Kooperasaun Adaljiza Albertina Xavier Reis Magno, Ministru Edukasaun, Juventude no Desportu Armindo  Maia,  Ministru Turizmu Komérsiu no Indústria José Lucas do Carmo da Silva, Ministru Interiór Taur Matan Ruak, Ministru Petróleu no Minerál Víctor da Conceição Soares.

Nune’e mós, Vise-Ministru Negósiu Estranjeiru no Kooperasaun Julião da Silva, Vise-Ministru Justisa José Edmundo Caetano, Vise-Ministru Administrasaun Estatál Lino de Jesus Torrezão, Vise-Ministru Saúde Bonifacio Mau Coli dos Reis, Vise-Ministru Edukasaun Juventude no Desportu António Guterres, Vise-Ministru Komérsiu no Indústria Domingos Lopes Antunes, Vise-Ministru Turizmu Komunitária no Kulturál Inácia da Conceição Teixeira, Vise-Ministru Agrikultura no Peska Abílio Xavier de Araújo, Vise-Ministru Interiór Antonino Armindo.

Iha biban ne’e, PR Lú Olo mós fó pose ba Sekretáriu Estadu Formasaun Profisionál no Empregu Alarico de Rosário, Sekretáriu Estadu Kooperativa Elizário Ferreira, Sekretáriu Estadu Peska Elídio de Araújo, Sekretáriu Estadu Juventude no Desportu Abrão Saldanha, Sekretáriu Estadu Protesaun Sivil Joaquim José Gusmão dos Reis Martins.

Hafoin Xefe Estadu fó pose ba membru Governu, nune’e totál membru VIII Governu Konstitusionál hamutuk na’in-43.

VIII Governu Konstitusionál forma liuhosi plataforma Partidu Libertasaun Populár (PLP), Frente Revolucionária de Timor-Leste Independente (FRETILIN) no Kmanek Haburas Unidade Nasional Timor Oan (KHUNTO)

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here