Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/Francisco Sony

DILI, 09 marsu 2022 (TATOLI)— Prevedoria Direitu Umanu no Justisa (PDHJ, sigla portugés), deteta durante atividade kampaña eleitorál hosi kandidatu Prezidente Repúblika períodu 2022-2027 iha irregularidade balun no la kumpre medida prevensaun COVID-19.

“Ami haree kandidatu Prezidente Repúblika balun komete irregularidade, hanesan kampaña iha Munisípiu Viqueque, kandidatu Prezidente Republika númeru sorteiu 8 no kandidatu Prezidente Repúblika 14 halo kampaña besik eskola, nune’e perturba prosesu aprendizajen ba estudante sira,” Provedora Direitu Umanu no Justisa, Jesuina Maria Ferreira Gomes, hateten liuhosi konferénsia imprensa iha PDHJ-Caicoli, kuarta ne’e.

Notísia relevante:Konfrontu iha Baucau, Joven ida mate no ida kanek todan

Tanba, iha artigu 12 hosi dekretu Governu númeru 3/2022 sita hala’o kampaña labele besik iha edífisiu relijiozu, istalasaun militár inklui edifisiu estadu nian.

“Ha’u hanoin artigu ne’e la sita eskola no ospitál, maibé m halo kampaña besik ida ne’e sei respeita ba distánsia,” nia akresenta.

Alende ne’e, PDHJ mós nota iha monitorizasaun ne’ebé ba atividade kampaña Prezidensiál ne’e kandidatu Prezidente Repúblika sira la kumpre regra sanitaria ba prevensaun Covid-19.

Tanba, Iha dekretu-lei 26/2021 ne’e ko’alia kona-ba ezensionál, temporária no vijilánsia sanitária ne’ebé obriga individu hotu-hotu atu respeita distansiamentu sosiál pelumenus metru ida, fase liman bebeik, uza máskara no Evita halibur malu barak.

PDHJ mós deteta liuhosi monitoririzasaun ho baze ba kódigu estrada hatudu apoiante barak mak sira uza motorizada la uza kapasete, balun ne’ebé maka uza karreta laiha xapa matríkula, maibé Polisia Nasionál Timor-Leste (PNTL) la halo intervensaun.

“Ita nian polisia sira ne’e seidauk halo intervensaun másimu liuliu motorizada ne’ebé maka uza kazu resin sira no la uza kapasete,maibé  ita nian polisia sira la halo intervesaun”, nia lamenta

PDHJ mós rejista iha kampaña eleitorál mosu lianfuan provokativu no iha tendénsia ba insulta malu entre ekipa susesu hasoru Kandidatu Prezidente Repúblika seluk.

Tanba, Iha artigu 13, Dekretu-Governu 3/2022,  kona-bá kampaña no propaganda eleitorál estabelese iha proivizasaun insulta  no durante kampaña tenke promove linguazen ne’ebé  di’ak ho ambiente pasífiku,  labele defama no labele insulta kandidatu ka apoiante sira seluk.

Entretantu, PDJH mós deteta  kandidatu Prezidente Repúblika balun hala’o atividade kampaña la tuir oráriu CNE nian. Tanba tuir artigu 10, Dekretu-Governu 3/2022 hateten kandidatu Prezidente RepÚblika atu muda oráriu tenke konfirma ba Komisaun Nasionál Eleisaun (CNE, sigla portugés) loron lima antes no mós informa ba autoridade seguransa atu haree.

PDJH mós deteta mosu konfrontu iha munisípiu Viqueque no Baucau entre apoiante kandidatura Prezidente Repúblika númeru sorteiu 6 no númeru sorteiu 9.

“Ha’u hanoin CNE atu aprova kalendariu ba kampaña tenke prevene labele tau kandidatura ne’ebé iha apoiante barak iha fatin ida, nune’e prevene konfrontu,” nia rekomenda.

PDJH mós nota labarik barak mak envolve iha kampaña, nune’e Institutu Defeza ba Direitu Labarik atu haree kestaun ne’e.

“Ami mós deteta funsionáriu públiku balun envolve iha kampaña. Ha’u hanoin ba membru Governu sira bele, tanba iha lei ne’ebé proteje sira, maibé funsionáriu públiku labele,” nia fó hanoin.

Daudaun ne’e, PDHJ hahú elabora relatóriu atu halo publikasaun, hafoin kampaña eleitorál ramata.

“Relatóriu ida ne’e ita sei haruka ba iha ba CNE, PNTL no Institutu Defeza Direitu Labarik nian atu sira bele foti asaun hodi futuru labele akontese fali,” nia akresenta.

Notísia relevante: PNTL rejista krime eleitorál iha munisípiu tolu

Jornalista: Natalino Costa

Editór      :  Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here