Xefe Departamentu Relasaun Públika Komandu Jerál Polisia Nasionál Timor-Leste, Superintendente Xefe Armando Monteiro, Imajen Tatoli/Natalino Costa

DILI, 07 marsu 2022 (TATOLI)— Xefe Departementu Relasaun Públiku, Komandu Jerál Polísia Nasionál Timor-Leste (PNTL), Superintendente Xefe, Armando Monteiro, informa durante kampaña ba kandidatu Prezidente Repúblika, hahú iha loron 2 to’o 6 marsu, PNTL konsege rejista kazu krime eleitorál iha munisipiu munisípiu Viqueque, Buacau no Manufahi.

“Situasaun jerál iha munisipiu sia inklui Rejiaun Administrativu Oé-cusse no Ambeno (RAEOA) la’o di’ak. Maibé iha munisípiu tolu mak mosu krime eleitorál hanesan akontese iha Munisípiu Viqueque, Baucau no Manufahi,” Xefe Departementu Relasaun Publiku, Komandu Jeral Polisia Nasional Timor-Leste (PNTL), haktuir ba jornalista liu hosi konferensia imprensa ne’ebe halo iha Kuartel Jeral PNTL, Caicoli, segunda ohin.

Notísia relevante:Konfrontu iha Baucau rezulta na’in-lima kanek no uma ida rahun

Krime eleitorál tanba apoiante kandidatu Prezidente Repúblika sira mak halo konfrontu hanesan iha Viqueque apoiante no militante kandidatu PR ho númeru sorteiu 6, tuda malu hasoru apoiante kandidatu númeru sorteiu sia.

Kazu ne’e akontese iha loron sesta (4/3), bainhira kandidatu númeru sorteiu sia halo kampaña iha Viqueque. Hafoin apoiante no militante sira partisipa kampaña iha Viqueque-Villa no iha dalan mosu provoka ba malu hodi tuda malu ho apoiante númeru sorteiu 6  iha suku Makadiki.

“Ema balun kanek no kazu ne’e ita halo ona investigasaun no konsege detein ona suspeitu na’in-tolu,” Armando Monteiro afirma.

Iha munisípiu Baucau, domingu (6/3) mosu konfrontu entre militante no apoiante kandidatura PP númeru sorteiu 6 no numeiru sorteiu sia.  Iha konfrontu ne’e, rezulta ema nain-16 mak kanek, uma ida no motór rua hetan estragu  inklui mós sasan balun.

“Polísia halo atusaun ba kazu refere, agora daudaun kazu ne’e iha ona investigasaun nia laran. Sei halo hela identifiksaun ba suspeitu sira. Tanba iha Baucau horiseik akontese ataka malu apoiante kandidatu numeru sorteiu 6 no kandidata Prezidente Republika númeru sorteiu 9 iha mós konfrontu iha postu administrativu Venilale no Quelicai. Tanba ita seidauk iha suspeitu loloos ba iha kazu ne’e rasik,” Xefe Departementu Relasaun Publiku Komandu Jerál PNTL ne’e akresenta.

Alende ne’e, kazu ne’ebé akontese iha Manufahi tanba mosu dezentedimentu entre apoiante kandidatu balun.

“Kazu ne’e mós iha ona investigasaun, tanba ne’e husu ita hotu atu hein de’it,” nia afirma.

Ho kazu krime eleitorál ne’e, Armando Monteiro hateten, Komandu PNTL munisípiu Viqueque, Baucau no Manufahi halo ona enkontru alargada ho Komisaun Nasionál Eleisaun (CNE, sigla Portugés), hamutuk ho ekipa susesu sira atu halo prevensaun aktu sira hanesan labele mosu tan iha períodu kampaña no eleisaun prezidensiál tuir mai.

“Husu mós ba ekipa susesu kandidatura Prezidente Repúblika nain-16 kolabora nafatin ho autoridade seguransa atu hamutuk ita kontrolu, promove ita nian unidade no amizade hodi haburas   demokrásia iha ita nian rai doben Timor-Leste. Hodi nune’e akontesimentu ne’ebé mak akontese iha Manufahi, Viqueque no Baucau horiseik labele akontese iha loron hirak tuir mai,” Armando Monteiro sujere.

Armando Monteiro mós husu ba públiku atu kontinua hakmatek no labele rona boatu sira hodi kontribui nafatin ba prosesu kampaña eleitorál iha ámbitu pás no estabilidade.

PNTL mós rejista kazu aseidente tráfegu hamutuk 21 no óbitu na’in-ida no insidente hamutuk 14 durante  períodu kampaña ne’ebé hahú hosi loron 1 to’o 6 marsu ne’e.

Notísia relevante: CNE halibur ekipa susesu solusiona konfrontu entre apoiante iha Baucau

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here