Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno. Imajen Tatoli/Egas Cristovão

DILI, 16 fevereiru 2022 (TATOLI) –  Governu Timor-Leste no Austrália selebra akordu foun ida kona-ba mobilidade traballadór nune’e Timor-oan sira bele serbisu iha Austrália ho durasaun fulan ualu to’o tinan haat.

Ministra Negósiu Estránjeiru no Kooperasaun (MNEK), Adaljiza Magno, fó-sai katak, Timor-Leste ho Guvernu Australia selebra ona akordu foun kona-ba mobilidade traballadór Timor-oan bele kontinua ba serbisu iha Austrália ho durasaun hosi fulan-ualu (8) to’o tinan haat (4).

“Ha’u hasoru malu ho Ministra Negósiu Estránjeiru Australia nian, asina Pacific Australian Labour Mobility (PALM). Ida-ne’e akordu foun ho Governu Austrália kona-ba akordu pásifiku mobilidade nian kona-ba haruka traballadór Timor-oan sira ba serbisu iha Austrália.

Akordu foun ne’e sei fó oportunidade ba Timor-oan sira ba hela iha Austrália hosi fulan-ualu (8) to’o tinan haat (4),” Ministra Adaljiza Magno, informa liuhosi konferénsia imprensa iha aeroportu Nicolau Lobato, kuarta ne’e.

Nune’e mós MNEK hala’o vizita ba iha fatin Griffith, ne’ebé Timor-oan sira na’in-17 hala’o serbisu iha fatin ne’e, tanba tuir novidade ne’ebé públika hosi mídia ABC nian, fó valór boot ba traballadór sira hosi Timor iha Australia tanba hatudu disiplina no komportamentu di’ak.

“Iha selebrasaun akordu ne’e, ha’u husu ba MNEK AustrÁlia la’ós de’it haruka traballadór Timor-oan ba serbisu iha área agrikultura nian, maibé mós ba área seluk hanesan serbisu água saneamentu no indústra seluk,” nia katak.

Nia fó-sai katak, akordu foun ne’ebé nasaun rua ne’e selebra sei presiza tán traballadór na’in-450 no daudaun ne’e na’in-haat (4) arranka ona.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here