Primeiru-Ministru, Taur Matan Ruak, parabeniza loron mundiál feto. Imajen/GPM

DILI, 08 marsu 2022 (TATOLI)—Primeiru-Ministru (PM), Taur Matan Ruak, parabeniza feto Timor-Leste no iha mundu tomak, relasiona ho komemora loron feto mundiál iha loron 08 marsu.

 “Hakarak parabeniza inan-feton sira ba loron feto nian, espera katak loron ida-ne’e sai reflesaun hodi halo prátika ne’ebé halo kada tinan, atu ajuda ita eleva partisipasaun feto sira-nian iha prosesu dezenvolvimentu nasaun,” PM hato’o hafoin partisipa workshop kona-ba prosedimentu planeamentu, monitorizasaun no avaliasaun, iha Ministériu Finansa, Aitarak-laran, tersa ne’e.

Notísia relevante: PN Kongratula Selebrasaun Loron Feto Mundiál Ho Unanimidade

Aleinde ne’e, Xefe Ezekutivu  rekoñese partisipasaun feto iha ukun rasik-an no dezenvolvimentu nasionál.

“Bainhira ita haree ita-nia istória, papel feto nia importante tebes, bolu dehan luta emansipasaun, sé ita haree uluk iha prezensa koloniál portugeza iha Luka, munisípiu Viqueque, iha feto ida halo atividade revolta hasoru portugés sira, no iha fatin barak hosi avo no ita-nia tempu mós feto asume papel importante luta ba ukun rasik-an,” PM Taur haktuir.

Enkuantu, Governu liuhosi Sekretaria Estadu Igualdade no Inkluzaun (SEII) tinan ne’e komemora loron mundiál feto iha munisípiu Lautém.

Tinan ne’e komemora loron feto mundiál ho tema ‘Igualdade jéneru loron-ohin ba loron-aban ida ne’ebé sustentável’, ne’ebé rekoñese papél importante feto nian hodi hasoru dezafiu boot sira iha prosesu dezenvolvimentu nasionál.

“Dezafiu sira hanesan mudansa klimátika ne’ebé sai grave bele hamosu dezastre naturál no kalamidade iha ita-nia país.  Dezafiu sira mundu nian ne’ebé interligadu no interdependente liután, sujeitu ba krize hanesan pandemia COVID-19 nian, ne’ebé prevensaun, mitigasaun no ninia kombate, depende liu ba kooperasaun individuál no koletiva, ne’ebé implementa ona iha ita-nia país no nivel internasionál,” refere nota ne’ebé Agência TATOLI asesu.

Dezafiu sira ba moris-di’ak, ekonómiku no sosiál, iha kapasidade atu kria oportunidade foun sira ne’ebé disponível ba ema hotu iha prosesu konstrusaun ba futuru ne’ebé teknolojikamente modernu no sustentável liu.

Aleinde ne’e, dezafiu sira ne’ebé sai hanesan obstákulu loloos hodi fó risku ba implementasaun di’ak hosi polítika sira ne’ebé sensível ba kestaun jéneru no mitigasaun vulnerabilidade nian mak hanesan halakon ki’ak, kombate subnutrisaun no asesu ba serbisu báziku importante sira hanesan saúde, edukasaun, hela-fatin ka seguransa sosiál, no seluk tan.

“Iha dezafiu sira ne’e hotu, ita konta ho Feto sira hanesan ajente transformasaun no mudansa, iha família, eskola, iha servisu-fatin, empreza no komunidade sira. Feto hotu-hotu, liuliu feto sira hanesan dirijente ho reprezentatividade iha lideransa, aleinde kontribui ho kapasidade no koñesimentu sientífiku, étiku no morál sira ne’ebé aumenta beibeik ba igualdade jéneru nian, sai mós nu’udar protagonista no na’in ba polítika públika kona-ba lejitimidade demokrátika, governasaun di’ak no dezenvolvimentu ne’ebé sustentável liu,” afirma nota hosi Governu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here