Primeiru-Ministru, Taur Matan Ruak, iha debate jeneralidade loron daruak iha uma fukun Parlamentu Nasionál. Foto António Goncalves

DILI, (TATOLI) – Parlamentu Nasionál (PN) liuhosi sesaun plenária iha tersa ne’e fó votu kongratulasaun ba selebrasaun loron mundiál feto iha loron 8 marsu ho rezultadu a favór 54.

Deputadu rekerente husi votu kongratulasaun ne’e mak hanesan Duarte Nunes, António Nobre Tilman, Aniceto Guterres, Cornélio Gama L7, António Benevides no Gilman dos Santos.

“Ezije buka mekanizmu efetivu atu kombate forma diskriminasaun kontra feto”, refere deklarasaun votu ne’ebé lee husi Sekretária Meza, Maria Terezinha Viegas.

Nia hatutan: “Biban selebrasaun loron feto mundiál, Parlamentu Nasionál manifesta solidaridade ba feto sira iha mundu ne’ebé sai vítima violénsia no diskriminasaun, nomós reafirma kompromisu atu forma sosiedade ne’ebé justu iha violénsia no diskriminasaun nune’e kualidade direitu nia bele sai realidade”.

Prezidente Grupu ba Feto Parlamentu TL (GMPTL-sigla portugés), Lídia Norberta, liuhosi intervensaun konsidera biban ne’e nu’udar movimentu ideál atu promove, valoriza feto no reflete hamutuk kona-ba sira nia partisipasaun iha moris ekonomia, liu-liu oinsá atu asesu ba oportunidade no sevisu poténsia sira, nune’e bele aumentu rendimentu iha família.

“GMPTL hanoin katak atu atinje meta dezenvolvimentu ho igualdade, kualidade no inovativu ba ema hotu, presiza investe iha kapasitasaun ekonomia feto atu atinje duni igualdade jéneru nomós halakon kiak no aumentu ekonomia ne’ebé mak inkluzivu liu”, tenik deputada hosi bankada FRETILIN ne’e.

Nia hatutan: “Presiza hakbiit feto sira atu partisipa mútuamente iha moris ekonomia, iha setór hotu-hotu para bele atinje meta globál ba dezenvolvimentu ne’ebé sustentável no hadi’a kualidade feto no mane, nomós komunidade nia moris”.

Deputadu Adérito Hugo konsidera votu kongratulasaun kompara ho intervensaun GMPTL laiha apresiasaun ba vontade polítika Estadu RDTL atu halo balansu ne’ebé di’ak.

“Maizumenus ita fó rekoñesimentu uitoan ba atensaun sira ne’ebé mak ita halo, labele jeneraliza katak sei diskriminasaun feto iha nasaun seluk, ita ko’alia mak triste nafatin de’it maibé realidade iha Timor ita iha ona”, katak.

Tuir Deputadu CNRT ne’e tenke iha apresiasaun no akompañamentu ba saida mak iha ona, tanba ita nafatin iha diskriminasaun ba feto sira.

“Medida ne’ebé ita introdús hanesan lei eleisaun parlamentár, kuota, sekretaria ba feto, Sekretária Estadu, ba ha’u iha ona avansu lubuk ida ne’ebé tenke halo rekoñesimentu ho papel eroina sira nia durante rezisténsia. Tanba ne’e ba votus tau netik kontiúdu nasionál nia”, tenik.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here