Ámbitu seremónia komemorasaun loron mundiál feto, iha salaun Federasaun Hanai Malu, Bairro-Pité, tersa (08/03). Imajen TATOLI/Arminda Fonseca

DILI, 08 marsu 2022 (TATOLI)—Relasiona ho komemorasaun loron feto mundiál ba dala-55, Sekretáriu Estadu Kooperativa, Elizário Ferreira, enkoraja feto sira atu envolve iha atividade kooperativa hodi bele halo mudansa ba moris.

“Husu ba inan-feto sira ne’ebé daudaun ne’e tama grupu kooperativa, husu imi liuhosi kooperativa bele halo mudansa ba moris hahú hosi uma-laran, sosiedade, família, no nasaun,” Sekretáriu Estadu hateten iha salaun Federasaun Hanai Malu, Bairro-Pité, tersa ne’e.

Notísia relevante: SEKoop konsidera kréditu uniaun sai espíritu ba dezenvolvimentu kooperativa

Tema nasionál ne’ebé SEKoop foti iha loron ne’e maka ‘Ho kooperativa bele garante igualdade jéneru’, enkuantu tema internasionál maka ‘Igualdade jéneru ohin loron no ba futuru ne’ebé sustentável’.

Governante ne’e konsidera, bainhira envolve iha kooperativa, futuru sei nakloke liután no projeta ba kresimentu  ekonómiku aumenta no dezenvolvimentu boot liután.

“Feto mós tenke hatudu katak bele halo mudansa ho dezenvolvimentu liuhosi kooperativa, tanba feto ne’e preokupante tebes ba família, sosiedade no parte hotu. Bainhira ita-nia líder sira hahú hanoin atu ukun-an, feto sira mós partisipa no hahú foti kilat hasoru invazaun sira, hahú hosi Maria Tapó. Ne’e hatudu katak feto sira mós bele,” nia dehan.

Biban ne’e, Sekretáriu Estadu husu mós ba maluk feto sira atu utiliza teknolojia ho di’ak, nune’e bele hetan benefísiu.

“Ha’u enkoraja feto sira, iha mundu teknolojia ida-ne’e tenke kuidadu-an, nune’e labele monu ba tentasaun. Tenke utiliza rede sosiál ho di’ak tanba ohin loron ho mundu teknolojia, ema la’o tuir dezenvolvimentu teknolojia no globalizasaun. Ohin loron halo komunikasaun sai fasil liu, tanba ne’e sai dezafiu ida ba feto sira, tanba teknolojia bele halo ida besik bele sai dook no dook bele sai besik,” nia tenik.

Maski nune’e, nia konsidera utilizasaun teknolojia atu sai benefísiu depende ba entidade ida-idak no konsiénsia.

Iha fatin hanesan, Reprezentante Grupu Mulher Parlamentár Timor-Leste (GMPTL), Domingas dos Santos, enkoraja maluk feto sira hodi prepara-an hola parte iha dezenvolvimentu nasaun.

“Husu ba feto maluk sira, tenke aproveita oportunidade ba dezenvolvimentu ne’ebé iha, liuliu iha iguldade jéneru, nune’e ita labele dehan mane sira la fó oportunidade ba ita, maibé ita mak tenke aproveita didi’ak oportunidade ne’ebé iha hodi kontribui ba dezenvolvimentu iha ita-nia rai,” nia fó hanoin.

Iha Parlamentu Nasionál halo ona konvensaun ne’ebé iha kompoziasaun ba eliminasaun forma diskriminasaun hotu hasoru feto no labarik feto iha Timor-Leste.

“Ha’u hakarak kooperativa hanesan fatin ida ne’ebé própriu tebes atu ita ba moris ho sustentabilidade, bainhira ita serbisu ho kompromisu, onestu, no kreativu, maka ita sei hetan sustentabilidade,” Reprezentante GMPTL dehan.

Nune’e mós, Diretora Nasionál Polítika Jéneru no Inkluzaun hosi Sekretaria Estadu Igualdade no Inkluzaun (SEII), Maria Filomena Babo Martins, hateten, tempu to’o ona atu feto sira hamriik hamutuk ho mane sira atu kontribui ba dezenvolvimentu nasionál.

“Liuliu iha área sira ne’ebé mak hakbiit feto nia ekonómia, nune’e feto bele hamriik rasik iha nia-ain hodi hala’o nia moris loron-loron,” nia akresenta.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here