Reprezentante Prezidente Kréditu Uniaun BURAS Baguia, Paulino Maris, tara tais ba Sekretáriu Estadu Kooperativa (SEKoop), Elizário Ferreira, domingu (23/01), iha postu administrativu Baguia. Imajen TATOLI/Arminda Fonseca

DILI, 23 janeiru 2022 (TATOLI)–Sekretáriu Estadu Kooperativa, Elizário Ferreira, domingu ne’e, partisipa seremónia asembleia jerál ne’ebé realiza hosi membru kréditu uniaun Buka Funan Rasik (BURAS) iha postu administrativu Baguia, munisípiu Baucau.

Asembleia jerál nu’udar fórum a’as liu iha vida kooperativa, atu membru konsellu diretivu no fiskál sira bele presta konta ba membru sira hodi hili reprezentante foun atu jere kooperativa.

“Ita ko’alia kona-ba kooperativa kréditu ne’e importante, tanba uniaun kréditu mak espíritu ba dezenvolvimentu kooperativa liuhosi asesu finanseiru ne’ebé nia fó vida ba kooperativa atu moris,” Sekretériu Estadu hateten iha postu administrativu Baguia.

Notísia relevante: SEKoop husu komunidade Lisadila harii kooperativa produsaun

Nia dehan, kooperativa sai espíritu ba dezenvolvimentu ekonomia no kontribui ba kreximentu, ne’ebé kooperativa ninia membru mak tenke halo serbisu barak liu iha nível baze hanesan dezenvolve atividade produtivu, ortikultura no peska.

“Tanba sira hotu atu kontribui ba dezenvolvimentu ekonomia no kreximentu nasionál. Nune’e kada tinan tenke halo asembleia jerál ordinária no kada tinan-tolu responsável kooperativa sira presiza troka liuhosi asembleia jerál membru kréditu uniaun BURAS atu fó sira-nia partisipasaun no kontribuisaun ba prosesu avalisaun atividade saida de’it  mak dirijente no fiskalizadór hala’o iha tinan fiskál 2019,” nia akresenta.

Asembleia jerál mós nu’udar ámbitu ba edukasaun demokorátika iha kooperativa nia-laran, ne’ebé membru hotu iha direitu atu hato’o aspirasaun no krítika konstrutiva atu lori kréditu ba oin.

“Entaun Ha’u-nia prezena iha asembleia jerál ne’e atu akompaña, supervisiona, inklui monitoriza funsionamentu ogranizasionál kooperativa ne’e, atu asegura no motiva populasaun hodi partisipa vida kooperativa,” membru Governu ne’e dehan.

Sekretáriu Estadu nota mós katak partisipasaun komunidade iha kooperativa kréditu uniaun BURAS Baguia ne’e másimu tebes tanba iha ona membru 187.

“Estatutu kooperativa ne’ebé regula katak asembleia jerál ne’e membru hahú ho ema 51, maibé sira liu ona ida-ne’e, hatudu katak sira-nia partisipasaun ne’e másimu tebes,” nia apresia.

Eziste desde tinan 2018

Iha fatin hanesan, Prezidente kréditu uniaun BURAS Baguia, Agustinho Guterres, hateten, sira-nia kooperativa eziste hahú loron 03 fevereiru 2018.

“Ami-nia kooperativa ne’e hahú ho membru na’in-30, maibé daudaun sa’e ba kuaze 200 ona. Atividade mak rai osan no empresta, daudaun ne’e ami-nia kapitál hamutuk $60.000,” nia hateten.

Nune’e mós, Administradór postu administrativa Baguia, munisípiu Baucau, António dos Ramos, agradese ba SEKoop no komitiva ne’ebé bele hakat ba postu ne’e hodi haree kondisaun kooperativa no iha biban hanesan bele fahe esperénsia.

“Ha’u husu atu kontinua kooperativa ne’ebé harii ona ho di’ak tanba dezenvolvimentu ata la’o ba oin, la’ós depende de’it ba Governu, maibé mós hosi kooperativa, nune’e ita serbisu hamutuk lori kooperativa ne’e oin, maibé keta baruk halo to’os no natar, tanba kooperativa ne’e la’ós ho osan de’it maibé ba hotu-hotu,” nia tenik.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here