Vise Prezidente Parlamentu Nasionál, Maria Angelina Lopes Sarmento. Imajen/Tatoli Egas Cristovao

DILI, 08 marsu 2022 (TATOLI)— Vise Prezidente Parlamentu Nasionál, Maria Angelina Lopes Sarmento, dehan deputadu sira la prenxe korum, atu hala’o diskusaun no aprovasaun ba rezolusaun Parlamentu Nasionál númeru 89/V (4) kona-ba krize iha Ukráina, nune’e sei re-ajenda ba loron seluk.

“Iha plenária, tersa ne’e, ajenda importante ida mak halo aprovasaun ba rezolusaun funu iha Ukráina, maibe tanba Deputadu sira la prenxe korum entaun deside ensera plenária. Rezolusaun ne’e, tuir loloos aprova iha ohin, maibé ita kordena fali ho Ministériu Negósiu Estrajeiru Kooperasaun (MNEK), ita re-ajenda fali hodi halo diskusaun bainhira deputadi sira prenxe korum,” Vise Prezidente PN ne’e hateten iha Parlamentu Nasionál, tersa ne’e.

Notísia relevante:  Xanana husu líder mundiál promove diálogu hapara “funu” entre Rúsia no Ukráina

Tuir rejimentu Parlamentu Nasionál katak funsionamentu iha plenária ne’e minimu Deputadu nain-23, maibé ba korum diliberativu katak atu halo votasaun ruma ne’e, presiza iha Deputadu nain-33 mak foin bele halo votasaun ba rezolusaun ruma ou lei ruma ne’ebé iha.

“Parlamentu Nasionál (PN) la konsege realiza plenária ba sesaun tanba ho razaun katak deputadu barak mak akompaña prosesu eleitorál hosi kandidatu Prezidente Repúblika sira. Tanba ne’e maka la prenxe korum ba funsionamentu plenária,” nia akresenta.

Deputadu sira ne’e ema polítiku, sira la’ós funsionáriu públiku ka administrasaun públika nia ema tama servisu tuir oras no tuir loron efetivu.

“Deputadu sira ema polítiku ne’ebé iha períodu tinan polítika iha tempu ida ne’e mak Deputadu sira sei hala’o obrigasaun atu halo kampaña ka halo atividade polítika ka kampaña partidaria nian, ne’e lei fó dalan,” Vise PN ne’e esplika.

Notísia relevante:  PM Taur manifesta solidaridade ba povu Ukráina

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here