Komisaun Nasionál Eleisaun (CNE-sigla portugés) realiza enkontru ekstradionáriu ho Governu, órgaun eleitorál, reprezentante kandidatu Prezidente Repúblika (PR). Imajen Tatoli/Osória Marques.

DILI, 08 marsu 2022 (TATOLI)—Prezidente Komisaun Nasionál Eleisaun (CNE-sigla portugés), José Agostinho da Costa Belo, informa rezultadu enkontru ekstradionáriu entre Governu, órgaun eleitorál, reprezentante kandidatu Prezidente Repúblika (PR), atu realiza eleisaun prezidensiál 2022 iha Austrália ne’e sei hein desizaun hosi Tribunál Rekursu.

Notísia Relevante: CNE deside la realiza eleisaun prezidensiál iha Austrália

“Ohin iha ne’e hato’o hotu ona ita-nia hanoin no orsida ita hotu ne’ebé iha ne’e, sei asina akta ida katak ita hotu hein de’it desizaun hosi Tribunal rekursu. Karik Tribunál Rekursu dehan realiza ita simu, no karik la realiza totál ita hotu tuir de’it desizaun no ita tuur hakmatek,” José Agostinho da Costa Belo hateten iha enkontru ekstradionáriu, iha salaun Laline, Larigutu, iha CNE Colmera, Dili, tersa ne’e.

Prezidente CNE hateten, artigu, argumentu no hanoin ne’ebé ohin parte hotu hato’o sai referénsia ida ba CNE hodi bele hakat tuir.

Tanba, tuir karta deliberasaun CNE 05/III/2022, kuarta-feira, 2 de março de 2022, Kona-ba apresiasaun ba prosesu estabelesimentu sentru votasaun iha diáspora Austrália atu la realiza eleisaun 2022.

Atu la realiza eleisaun prezidensiál 2022 ne’e, parte Tribunál Rekursu notifika ona CNE inklui partidu polítiku mós la konkorda entaun ohin CNE bolu parte hotu hodi rona opiniaun no deside atu hein de’it desizaun hosi Tribunál Rekursu.

Maske seidauk iha desizaun hosi Tribunál Rekursu maibé Vise-Ministru Administrasaun Estatál (MAE), Lino de Jesus Torrezão, hateten, Governu tenke realiza eleisaun prezidensiál 2022 iha Austrália.

“Opiniaun hotu ita rekorda ona no hein desizaun Tribunál Rekursu no hanesan reprezentante Governu nian, ha’u reafirma katak STAE prontu realiza eleisaun iha Austrália no segunda tenke aranka bainhira rezultadu mai mak Tribunál deside ida-ne’ebé mak loos no sala,” nia dehan.

Tuir nia, presiza hatene mós kona-ba dever síviku ba kada eleitór nian tanba ne’e Governu liuhosi STAE prontu realiza eleisaun iha Austrália, no uza nafatin lista eleitór ne’ebé uza ikus iha eleisaun 2018 nian.

Diretór Jerál Sekretariadu Tékniku Adminitrasaun Eleitorál (STAE), Acilino Manuel Branco, hateten hotu-hotu hein desizaun hosi Tribunál Rekursu maibé STAE nafatin esforsu hodi halo preparasaun ba eleisaun prezidensiál 2022.

“Ita hein desizaun hosi Tribunál Rekursu maibé ami tékniku nafatin halo preparasaun ba realizasaun eleisaun prezidensiál iha Austrália no iha loron 14 marsu ekipa tékniku tenke transporta ona materiál ba Austrália,” nia dehan.

Komisáriu CNE, Olavio Almeida, argumenta katak eleisaun prezidensiál ne’e bele realiza maibé bainhira eleitór ida-nia naran laiha sistema sé mak sai responsabilidade no karik rezultadu eleisaun mak ema liu fali lista eleitór ne’ebé públika hosi STAE, ne’e mós sai kestaun ida tanba bele dehan fraude ida.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here