Komandante PNTL Baucau, Superintendente Xefe António de Sá. Imajen Tatoli/Natalino Belo.

DILI, 06 marsu 2022 (TATOLI)—Komandante PNTL Munisipiu Baucau, Superintendente Xefe Antonio de Sa, informa asaun konfrontu ne’ebé akontese iha Baucau entre apoiante kandidatu Prezidente Repúblika númeru sorteiu 6 no 9 iha domingu (06/03) rezulta ema na’in-lima kanek, uma ida rahun no motor rua hetan estragu.

Superintendente Xefe Antonio de Sa hateten, konfrontu ne’e akontese bainhira kandidatu Prezidente Repúblika, Armanda Berta dos Santos, hala’o kampaña iha Baucau ne’ebé ho espontánia apoiante hosi kandidatu Prezidente Repúblika, Francisco Guterres Lú Olo, hamosu konfrontu entre apoiante sira.

“Kazu ne’e akontese iha tuku 13h00 meudia ne’e. Iha konfrontu ne’e, ema na’in-lima hetan kanek, uma ida rahun, inklui motor rua hetan estragu. Nune’e, Polísia Nasionál Timor-Leste (PNTL) tun ba halo kedan intervensaun, agora situsaun la’o normál fali no atividade kampaña iha munisípiu Baucau la’o fila-fali iha ambiente ne’ebe di’ak,” Komandante PNTL Munisipiu Baucau ne’e hateten ba Agência Tatoli, liuhosi telefónika, domingu ne’e.

Daudaun ne’e, nia dehan, kazu ne’e Komandu Polísia Nasionál Timor-Leste (PNTL) Munisípiu Baucau submete ona ba investigsaun maibé PNTL seidauk detein ema ruma.

“Ami ohin bolu de’it ekipa susesu sira hosi apoiante kandidatu númeru 6 no 9 mai ko’alia no konkorda ho sira hodi resolve. Apoiante kandidatu rua ne’e promete sei rezolve problema ne’e hamutuk, hodi buka solusaun ne’ebé di’ak. Maibé ami kontinua submete kazu ne’e ba investigasaun, hodi hatene loloos motivu hosi kazu ne’e mak aida loos,” nia dehan.

Komandu PNTL Baucau sei halo enkotru ho ekipa susesu ba kandidatu hosi kandidatu PR numeiru 6 no 9 hodi buka solusaun ba kazu ne’e, nune’e kazu ne’ebé hanesan labele akontese tan iha loron aban.

“Prosesu investigasaun hosi polísia ba asaun krime ne’e sei kontinua, tempu badak ami sei fó sai rezultadu investigasaun,” nia hateten.

Jornalista : Natalino Costa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here