Komandante PNTL Baucau, Superintendente Xefe António de Sá. Imajen Tatoli/Natalino Belo.

BAUCAU, 07 marsu 2022 (TATOLI) – Komandu Polísia Nasionál Timor-Leste (PNTL) kontinua buka-tuir autór balun tán kona-ba konfrontu ne’ebé akontese iha munisípiu Baucau.

Komandante PNTL Munisípiu Baucau, Superintendente Xefe António de Sá, hateten, konfrontu iha Baucau iha ona prosesu investigasaun no kontinua identifika autór sira relasiona ho akontesimentu konfrontu ne’ebé akontese iha loron domingu, 06 marsu ne’e.

“Ita submete ona ba prosesu investigasaun, kontinua nafatin identifika autór sira-ne’e, serdu ka tarde sei kaptura hodi submete ba prosesu,” Superintendente Xefe António Maria de Sá hateten iha Vila Nova, segunda ne’e.

Konfrontu refere akontese relasiona ho akontesimentu iha Vila Antiga relasiona ho kampaña eleitorál hosi kandidatura Prezidente Repúblika númeru sorteiu 9, Armanda Berta dos Santos hosi militante partidu Kmanek Haburas Unidade Nacional Timor Oan (KHUNTO).

Hosi konfrontu refere nia kontinuasaun kalan iha área Bercoli bainhira apoiante partidu KHUNTO fila ba uma hetan tuda hosi ema deskoñesidu ne’ebé subar-aan iha du’ut no foho-leten rezulta vítima na’in-10, na’in-sia kanek kmaan no na’in-ida ho inisiál PMG mane idade 22 hosi Suku Uatuhaco, aldeia Ariana, kanek todan iha ulun no hala’o tratamentu iha Hospital Rejionál Eduardo Ximenes (HoREX).

Nune’e mós rezulta vítima na’in-tolu seluk kanek kmaan iha postu administrativu Quelicai, munisípiu Baucau.

“Sira hetan tuda hosi ema deskoñesidu iha dalan bainhira fila ba uma,” António de Sá akresenta.

Antes ne’e mosu provokasaun iha Vila Antiga ne’ebé rezulta kioske fotokopia ida hetan tuda inklui motorizada rua estragu.

Diretór Komisaun Nasionál Eleisaun (CNE, sigla portugés) Munisípiu Baucau, Esmeraldo Damião Belo, sei hala’o sorumutu ho parte ekipa susesu kada kandidatura Prezidente Repúblika, PNTL no veteranu hodi solusiona problema ne’e.

“Objetivu mak atu prevene nune’e tuir mai labele akontese tán konflitu,” Esmeraldo hateten.

Esmeraldo esplika, kazu iha Vila Antiga mosu bainhira militante hosi diresaun Laga atu ba kampaña iha Triloka, derrepente mosu asaun nune’e rezulta tuda malu iha oras 01:40 meudia.

Vitíma sira-ne’ebé sasán estragu prienxe ona formuláriu reklamasaun prense kona-ba sasán ne’ebé hetan estragu inklui vítima sira-ne’ebé kanek no sei submete ba nasionál atu foti desizaun.

Notísia relevante:Konfrontu iha Baucau rezulta na’in-lima kanek no uma ida rahun

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here