Koordenadór no Portavóz ekipa susesu kandidatura Prezidente Repúblika 2022-2027, Francisco Guterres, Lú-Olo, Fernando Dias Gumão. Imajen TATOLI/Francisco Sony

DILI, 07 marsu 2022 (TATOLI)–Ekipa susesu Kandidatu Prezidente Repúbliku (PR), Francisco Guterres ‘Lú Olo’, propoin ba Komisaun Nasionál Eleisaun (CNE, sigla portugés) atu utiliza kanál Rádiu Televizaun Timor-Leste, Empreza Públika (RTTL, E.P) ba debate públiku Kandidatu PR sira, ne’ebé tuir planu sei realiza iha loron 15 marsu 2022.

“Ami hato’o ona karta protesta ida ba CNE, ligasaun ba planu atu halo debate entre kandidatu sira, ne’ebé deside atu fó responsabilidade ne’e iha koordenasaun GMN-TV nian. Tuir ami-nia haree katak debate ne’e loloos halo iha ita-nia RTTL, E.P nia koordenasaun, ho razaun tanba kanál kobertura to’o ba Timór laran tomak no bele kobertura luan liután kompara ho GMN-TV ne’ebé ninia kobertura ne’e la boot hanesan RTTL, E.P nian,” Koordenadór ekipa susesu, Fernando Dias Gusmão, informa liuhosi konferénsia imprensa, ne’ebé hala’o iha sede Kandidatu PR Lú Olo, iha Luz Clarita, Bairro Formosa, segunda ne’e.

Notísia relevante: Debate kandidatu Prezidente Repúblika 2022-2027 sei realiza iha 15 marsu

Aleinde ne’e, razaun ekipa susesu Kandidatu PR ne’e prefere liu kanál RTTL, E.P tanba ho kustu kiik kompara ho seluk.

“Povu balun iha foho karik laiha parabola sei defisil atu asesu ba debate ne’e, ita hakarak povu hotu bele asesu debate kandidatu sira, nune’e sira iha informasaun sufisiente kona-ba programa sira ne’ebé kandidatu sira hato’o,” nia akresenta.

Ba kestaun ne’e, Agência TATOLI tenta konfirma ba parte CNE via telefónika, maibé la atende.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here