Kandidatu PR períodu 2022-2027 asina paktu eleisaun pasífiku, iha salaun Laline-Lariguto, CNE, Caicoli, segunda (28/02). Imajen TATOLI/António Dasiparu

DILI, 07 marsu 2022 (TATOLI)—Bankada Congresso Nasionál Reconstrução Timorense (CNRT) no Kmanek Habubas Unidade Nasionál Timoroan (Khunto) no Partidu Demokrátiku (PD) iha Parlamentu Nasionál, husu kandidatu PR kumpre Paktu Eleisaun Pasífiku ne’ebé asina ona entre kandidatu sira hodi kria pás no estabilidade iha kampaña eleitorál to’o loron eleisaun.

Notísia Relevante: CNRT-KHUNTO-PD husu kandidatu PR kumpre Paktu Eleisaun Pasífiku

Deputadu CNRT, José Virgílio, lamenta ho konfrontu entre apoiante hosi kandidatu Prezidente Repúblika ho númeru 6 ho 9, Armanda Berta dos Santos ho Grancisco Guterres Lú Olo, iha munisípiu Baucau ne’ebé akontese iha domingu (06/03) ne’e.

“Partidu balun komesa la kumpre ona paktu eleisaun pasífiku ne’ebé antes ne’e asina entre kandidadu sira hanesan iha Baucau bainhira kampaña hotu mosu konfrontu,” Deputadu José Virgílio hateten iha plenária Parlamentu Nasionál, segunda ne’e.

Aleinde ne’e situasaun hanesan akontese iha Manufahi no Viqueque, nune’e husu militante partidu no kandidatu hotu nafatin iha maturidade polítika atu respeita malu tenke mantein pás no estabilidade.

Nia husu ba órgaun eleitorál hanesan Komisaun Nasionál Eleisaun (CNE, siglá portugés) ho Sekretariadu Tékniku Administrasaun Eleitorál (STAE) atu investiga kle’an ba aktu ne’ebé akontese liubá nune’e labele akontese tan.

Xefe Bankada KHUNTO, Olinda Guterres, kondena aktu hosi apoiante kandidatu balun ne’ebé halo asaltu ba militante kandidatu PR Armanda Berta dos Santos, iha sesta (04/03) bainhira fila hosi kampaña iha Watucabau, munisípiu Viqueque rezultadu na’in-ida hetan kanek.

Nune’e mós, konfrontu iha Baucau Villa, iha domingu (06/03) ne’e rezulta apoiante balun fila hosi kampaña hetan kanek hodi halo tratamentu iha ospitál, nune’e autoridade seguransa presiza atu halo investigasaun kle’an hodi hatene ninia motivu.

Nia husu Polísia Nasionál Timor-Leste (PNTL) liuhosi komandante eskuadra sira atu fó orientasaun, nune’e bainhira apoiante kandidatu hala’o dezlokasaun hosi postu ida ba iha fatin kampaña atu membru polísia akompaña to’o kampaña termina, nune’e iha dalan mosu atakasaun ruma presiza intervensaun lalais.

Nia hateten lideransa sira presiza eduka nia militante no apoiante tanba ho akontesimentu refere viola ona paktu unidade nasionál.

Deputadu PD, António da Conceição ‘Kalohan’, hateten lideransa hosi kandidatu ida-idak presiza fó edukasaun sivíka ba militante no evita linguajen insulta malu iha palku kampaña.

Xefe Bankada Fretilin, David Dias ‘Mandati’, hateten fó tempu ba autoridade seguransa atu kumpre prosedimentu ba apuramentu verasidade faktu no bainhira apuramentu iha tiha mak ita sei konklui katak akontesimentu ne’e mai hosi ne’ebé.

Notísia Relevante: Konfrontu iha Baucau rezulta na’in-lima kanek no uma ida rahun

Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here