Kandidatu Prezidente Repúblika (PR) períodu 2022 to’o 2027, ho  númeru sorteiu 4, Rogério Tiago Lobato. Imajen/Argentina Cardoso.

ERMERA,04 marsu 2022 (TATOLI)—Kandidatu Prezidente Repúblika (PR) períodu 2022 to’o 2027, ho  númeru sorteiu 4, Rogério Tiago Lobato, sesta ne’e, hala’o kampaña aberta iha Pároku Gleno, Munisípiu Ermera.

Durante kampaña, kandidatu independente ne’e introdús prioridade haat hanesan polítika forte, hametin ekonomia, tane aas kultura no identidade nasionál liuliu moderniza FALINTIL-Forsa Defeza Timor-Leste (F-FDTL) no Polisia Nasionál Timor-Leste (PNTL) hodi asegura soberani no riku-soin tasi.

“Ha’u-nia programa prioridade haat inklui moderniza F-FDTL no PNTL tanba to’o oras ne’e Estadu Timor-Leste sei fraku asegura riku-soin iha Tasi-laran hodi loke dalan ba ema kontinua na’ok ikan liuhosi peska ilegál,” Kandidatu PR Rogério Lobato, kompromete perante apoiante iha kampaña eleitorál.

Tanba ne’e, Kandidatu PR ne’e, hateten bainhira povu fó fiar mak sei hametin kooperasaun entre nasaun Portugál no Austrália atu tulun Estadu Timor-Leste hodi asegura riku-soin iha tasi-laran.

Daudaun ne’e, Timor-Leste nia ekonomia dependente de’it ba rai li’ur liuliu hahán importansaun ho70% mai hosi Indonézia, Vietname no Xina.

Kandidatu PR ne’e mós nota laiha kampu traballu rezulta joven barak mak buka moris iha rai liur hanesan Irlandia, Koreia Súl, Austrália no Reinu Unido hodi  sustenta sira moris.

“Ita rasik seidauk halo investimentu atu hasa’e produsaun ai-han iha rai-laran. Ita haree mós joven barak mak sai ba buka serbisu. Tanba ne’e ha’u manán sei fasilita joven sira ne’ebé hakarak atu ba servisu iha rai li’ur,” Kandidatu PR ne’e akresenta.

Iha biban hanesan, Apoiante Kandidatu PR ho númeru sorteiu 4, Laureno Lobato Siqueira Alves sente kontente bainhira mai partisipa kampaña aberta tanba kandidatu ida ne’e ho programa mesak di’ak no furak.

“Ohin, ha’u mai partisipa kampaña aberta ida ne’e tanba kandidatu númeru sorteiru 4 ne’e programa mesak di’ak, nune’e ha’u kontente tebes no sei fó votu konfiasa iha eleisau,” nia kompromete.

Iha kampaña aberta ne’e marka presenza hosi observadór internasionál hanesan Uniaun Europeia (EU), Komisaun Nasionál Eleisaun (CNE,sigla Portugés), Provedór Direitu Umanu Justisa (PDHJ) no hetan seguransa másimu hosi Polísia Nasionál Timor-Leste husi munisípiu Ermera.

Tuir oráriu hosi Komisaun Nasionál Eleisaun (CNE,sigla Portugés), katak Kandidatu Prezidente Repúblika ho númeru sorteiu 4 sei halo kampaña aberta iha loron 6 fulan-marsu iha munisípiu Bobonaro.

Notísia relevante:Kandidatu PR Rogério Lobato kansela kampaña aberta iha Gleno

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here