Diretora Jerál Administrasaun Finansa no Planeamentu, emposadu, Natalia Rocha da Costa (klaran) hasai foto hamutuk Prezidente Komisaun Funsaun Públika, Faustino Cardoso no Sekretáriu Estadu Kooperativa, Elizário Ferreira, hafoin simu pose, iha salaun MSSI, Caicoli, sesta (04/03). Imajen TATOLI/Arminda Fonseca

DILI, 04 marsu 2022 (TATOLI)–Prezidente Komisaun Funsaun Públika (KFP), Faustino Cardoso, sesta ne’e, fó pose ba Natalia Rocha da Costa, sai Diretora Jerál Administrasaun Finansa no Planeamentu, ba mandatu tinan-haat, hodi kompleta servisu iha Sekretaria Estadu Kooperativa (SEKoop).

“Husu ba Diretora foun ne’ebé ohin simu pose, ba oin servisu ho responsabilidade, hodi serví nasaun ne’e ho di’ak, tanba maski ho grau D, maibé bele asume kargu Diretora Jerál, ida-ne’e hatudu katak ita-boot iha kapasidade atu servisu ba rai ida-ne’e,” Prezidente KFP hateten iha salaun Ministériu Solidaridade Sosiál no Inkluzaun (MSSI), Caicoli.

Notísia relevante: SEKoop konsidera kréditu uniaun sai espíritu ba dezenvolvimentu kooperativa

Rezultadu ba prosesu selesaun tuir méritu iha SEKoop, konsidera kompete ba KFP deside kona-ba prátika administrativu jestaun iha setór públiku ba termu sira iha alinea númeru 2 artigu 6 lei, númeru 97/2009, 15 jullu, ne’ebé kria KFP hodi realiza rekrutamentu, nomeasaun no promosaun iha setór públiku.

Konsidera mós katak rejime internu ne’ebé delega ona ba Prezidente ka nia substitui lega podér sira hosi KFP, nune’e Prezidente KFP uza nia kompeténsia ne’ebé prevee iha lei númeru 7/2009, 15 jullu, hodi fó pose ba Natalia Rocha da Costa.

Iha fatin hanesan, Diretora Jerál Administrasaun Finansa no Planeamentu emposadu agradese ba kargu ne’ebé nia hetan no komprometidu sei obedese ba regra institusionál no Konstituisaun.

“Ha’u sei serví ba rai ida-ne’e ho leál no servisu tuir funsaun funsionáriu Públiku. Ha’u  sei hatudu servisu di’ak hodi serví povu ho onestidade, profisionalizmu, no fuan hodi tau a’as interese nasaun,” nia dehan.

Seremónia ne’e partisipa hosi Sekretáriu Estadu Kooperativa, Elizário Ferreira, inklui dirijente no funsionáriu SEKoop.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here