Labarik barak partisipa iha kampaña Kandidatu PR períodu 2022-2027 iha Viqueque, sesta (04/03). Imajen TATOLI/Vitorino Lopes da Costa

VIQUEQUE, 04 marsu 2022 (TATOLI)—Durante observasaun Instutu ba Defeza Direitu kriansa (INDDICA, sigla portugés) loron tolu ne’e iha kampaña Prezidente Repúblika (PR) iha munisípiu Viqueque, nota katak iha labarik barak mak asiste.

“Hahú hosi horiseik, kadidatu númeru 08 no daudaun kandidatu númeru 14, ne’ebé ami haree kuaze labarik barak maka partisipa iha atividade komísiu,” Xefe Departamentu Programa Polítika no Peskiza iha INDDIC, José Coreia da Piedade, hateten ba Agência TATOLI, iha kampu eis SMP 02 Beloi, Viqueque villa, sesta ne’e.

Notísia relevante: Labarik partisipa iha kampaña tanba ‘rame’

Xefe Departamentu Programa Polítika no Peskiza iha INDDIC, José Coreia da Piedade. Imajen TATOLI/Vitorino Lopes da Costa

Tuir nia, molok atividade kampaña, Institutu hamutuk ho Komisaun Nasionál Eleisaun (CNE, sigla portugés) hato’o ona mensajen ba komunidade hotu, liuliu ba profesór, inan-aman no parte Polísia Nasionál Timor Leste (PNTL), katak bandu labarik sira partisipa kampaña.

“Ita-nia mensajen liuhosi pamfletu no taka baner iha kada munisípiu sira hotu, bandu labarik sira labele partisipa atividade kampaña Kandidatu Prezidente Repúblika, maibé ita mós labele bandu labarik sira-nia envolvementu iha kampaña tanba balun sira-nia inan-aman mak lori,” nia akresenta.

Nune’e mós, daudaun INDDIC deteta mós atividade komísiu Kandidatu PR númeru sorteiu 14, José Manuel Ramos Horta, ne’ebé besik liu areadór eskola Ensinu Báziku Sentrál 01, nune’e profesór sira deside hapara atividade aula prezensiál no haruka labarik sira fila ba uma.

“Ida-ne’e ita sei haruka karta ba CNE atu tetu mós atividade kampaña ne’ebé besik iha área eskola, tanba tenki dook hosi área eskola hodi labele prejudika atividade ensinu aprendizajen,” nia tenik.

Xefe Departamentu ne’e dehan, presiza haree liu ba risku ekipa susesu partidu polítiku sira bele mobiliza labarik sira.

“Realidade labarik sira maka ba asiste rasik atividade kandidatu komísiu, importante maka inan-aman tenki kuidadu labarik sira, ida-ne’e responsável ita hotu atu haree, la’ós institutu nia de’it,” nia dehan.

Nune’e, INDDIC sei kontinua halo observasaun ba atividade Kandidatu PR ba períodu 2022-2027 to’o loron 16 marsu.

Jornalista : Vitorino Lopes da Costa

Editora     : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here