Ámbitu kampaña Kandidatu Prezidente Repúblika períodu 2022-2027, Martinho Germano da Silva Gusmão, iha Darsula, suku Gariuai, kinta (03/03). Imajen TATOLI/Jogerjo Guterres

BAUCAU, 03 marsu 2022 (TATOLI)—Komisaun Nasionál Eleisaun (CNE, sigla portugés) nota katak durante loron rua (kuarta-kinta), kampaña Kandidatu Prezidente Repúblika (PR) períodu 2022-2027 iha munisípiu sira, labarik sira kontinua partisipa, maibé la’os tanba entidade ruma mak mobiliza maibé tanba animasaun.

“Kona-ba envolvimentu labarik sira iha kampaña tanba rame, katak múzika ne’e maka dada labarik sira mai. Ami ho ofisiál supervizaun eleitorál sira seluk observa hela katak klaru iha labarik ida ka rua hamutuk ho inan-aman mak tula mai akompaña, loos duni buat sira ne’e loloos labele akontese, maibé nível koñesimentu no hanoin kona-ba oinsá partisipasaun labarik sira labele iha kampaña mak seidauk di’ak,” Sub-inspetór CNE Baucau, António Martins, hateten ba Agência TATOLI, iha ámbitu kampaña Kandidatu PR Martinho Gusmão, iha Darasula, suku Gariuai, postu Baucau villa, munisípiu Baucau, kinta ne’e.

Notísia relevante: Kampaña iha Lautém, CNE la deteta Kandidatu PR Horta viola regra

Ekipa integradu Baucau kompostu hosi Provedoria Direitu Umanu no Justisa (PDHJ) no Institutu Defeza Direitu Labarik (IDDL) observa hela situasaun ne’e maibé inan-aman maka laiha konsiénsia.

Iha sorin seluk, CNE mós nota katak kandidatura Prezidente Repúblika sira ne’ebé hala’o kampaña iha Baucau maioria kumpre regulamentu no oráriu, maibé ida maka la kumpre.

“Kandidatu sira ne’ebé kampaña iha Baucau, kompostu hosi Martinho Gusmão, Ramos Horta, Isabel Ferreira, maibé Maria Ángela Freitas da Silva mak ohin dadersan loloos halo kampañ iha Gor Kota-Baru, maibé la akontese no ami la hatene, tanba ne’e ami koko konfirma razaun muda fatin,” nia akresenta.

Sub-inspetór ne’e mós lamenta ho ekipa susesu kandidatura balun ne’ebé mak halo mini kampaña ne’ebé halai ses hosi oráriu.

“Kandidatu balun hala’o mini kampaña la tuir kampaña hanesan ohin iha postu administrativu Venilale, laiha kampaña maibé kandidatu balun hala’o, ami foin rona informasaun no laiha informasaun klaru ba CNE munisipál hodi ofisiál supervizaun sira belesuperviziona. Tanba ne’e maka ami sei informa ba ekipa susesu kandidatura sira-nian iha Baucau atu submete kalendáriu mini kampaña CNE, atu nune’e ajusta ho oráriu kampaña nasionál atu labele soke malu,” nia preokupa.

Maski nune’e, nu’udar órgaun eleitorál nafatin fó hanoin ba kandidatu sira atu la’o tuir oráriu ne’ebé aprova ona hosi CNE.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here