Ambiente kampaña loron dahuluk Kandidatu PR, José Manuel Ramos Horta, iha Lautém, kuarta (02/03). Imajen TATOLI/Jogerjo Guterres

LAUTÉM, 02 marsu 2022 (TATOLI)-Kandidatu Prezidente Republika (PR) períodu 2022-2027, ho númeru sorteiu 14, José Manuel Ramos Horta, kuarta ne’e, halo abertura kampaña iha munisípiu Lautém, hahú hosi tuku 15:30 to’o tuku 17:30. 

Diretór CNE Lautém, Anacleto Lopes. Imajen TATOLI/Jogerjo Guterres

Nune’e, durante kampaña hetan supervizaun hosi Komisaun Nasionál Eleisaun (CNE, sigla portugés).

“Liga ba prosedimentu sira, tantu rekezitu kampaña, ami haree hela Kandidatu José Ramos Horta halo ninia kampaña la’o tuir regra sira ne’ebé atribui, katak laiha irregularidade ruma,” Diretór CNE Lautém, Anacleto Lopes, informa ba Agência TATOLI, iha ámbitu kampaña Kandidatura PR Horta, iha kampu 745, Lautém.

Notísia relevante: Abertura kampaña iha Lautém, Horta introdús prioridade haat

Diretór ne’e dehan, tuir kalendáriu ne’ebé iha sira halo alterasaun, katak Kandidatu PR ne’e uza oras ba kampaña hahú hosi tuku 10:00 to’o 16:00 otl, maibé hahú tarde oituan.

“Ami-nia supervizaun bazeia ba lei sira ne’ebé mak hatuur, katak ami halo knaar no kompeténsia tun terrenu hodi tau-matan no asegura lala’ok kampaña sira, tuir prosedimentu sira ne’ebé hatuur ona iha lei. Ekipa supervizór sira koloka iha fatin lima hodi superviziona kampaña Kandidatu Ramos Horta nian, hodi akompaña mobilizasaun iha terrenu no observa kondisaun ruma ne’ebé ita la espera,” nia akresenta.

Ekipa CNE mós nota katak labarik barak mak envolve iha kampaña, maibé la’ós ekipa susesu Kandidatu PR mak mobiliza.

“Tuir lei bandu labarik sira partisipa iha kampaña, maibé tuir ami-nia observasaun iha terrenu, tantu ema hirak ne’ebé iha faze resesaun ba kandidatu, ami haree ema sira ne’e adultu ona. Iha parte seluk labarik sira mós iha, maibé la’ós labarik ne’ebé ema organiza, signifika labarik sira mai ho vontade rasik tanba iha espasu públiku sira hanesan ne’e dada ema hotu nia atensaun, tantu labarik kiik ka ema boot partisipa direta de’it ho individualmente, ne’ebé ami observa hela katak laiha ekipa susesu mak organiza labarik sira, no sira ne’e mai ho vontade rasik,” Diretór CNE esklarese.

Tuir kalendáriu ne’ebé fó sai ona, kampaña sei realiza durante semana rua, hahú loron 02 to’o 16 marsu 2022.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here